Almaty ákímí Darhan Satybaldy Halyqaralyq áıelder kúní – 8 nauryz qarsańynda Qazaqstan Respublıkasy Prezıdentíníń atynan memlekettík nagradalardy tabystady, – dep habarlaıdy aqshamnews.kz tílshísí.
Merekelík qabyldau barysynda ákím áıelderdí kele jatqan merekemen qūttyqtap, olardyń qala men eldíń damuyna qosqan úlesín atap óttí.
Qazaqstan Respublıkasy Prezıdentíníń Jarlyǵymen mádenıettí damytuǵa qosqan zor úlesí úshín III dárejelí «Barys» ordenímen Qazaqstannyń halyq artısí, teatr jáne kıno aktrısasy Núketaı Myshbaeva marapattaldy. Ol 70 jyldan astam uaqyt boıy Mūhtar Áuezov atyndaǵy Qazaq memlekettík akademıyalyq drama teatrynda eńbek etíp, sahnada júzden astam beınení somdaǵan. Bıyl aktrısa 90 jasqa tolady.
«Qūrmet» ordení «Asmed» tegín klınıkalar jelísíníń negízín qalaushy Raushan Jaqsybaıǵa, Qazaqstan Respublıkasy Ūlttyq bankí Ūlttyq tólem korporatsıyasy tóraǵasynyń orynbasary Ásel Marchenkoǵa, pedagogıka salasynyń ardagerí, matematıka páníníń mūǵalímí Tūrsynkúl Tasbolatovaǵa, sondaı-aq Almaty onkologıyalyq ortalyǵynyń dáríger-onkology, medıtsına ǵylymdarynyń kandıdaty, eńbek ardagerí Álıya Tóreshevaǵa beríldí.
«Eren eńbegí úshín» medalí №178 mamandandyrylǵan lıtseıdíń bıologıya pání mūǵalímí Aıdana Aıdarovaǵa, «Almaty jylu jelílerí» kásíporny Soltústík paıdalanu audanynyń ekínshí razryadty esepshísí Elena Kryukovaǵa, Túrksíb audany №4 jergílíktí ózín-ózí basqaru komıtetíníń tóraıymy Anarkúl Qūrmanbaevaǵa, sondaı-aq №15 sanatorlyq mektep-ınternaty dırektorynyń oqu ísí jóníndegí orynbasary Aıdana Tynybekke tabystaldy.
Ís-shara sońynda marapat ıelerí qala ákímímen bírge estelík suretke tústí.
Aıta keteıík, merekelík qabyldau Dostyq úıínde óttí. Oǵan bílím beru, medıtsına, mádenıet, energetıka, bıznes jáne qoǵamdyq qyzmet salalarynda eńbek etíp júrgen áıelder qatysty.
