Almatydaǵy Respublıka saraıynda Halyqaralyq áıelder kúníne arnalǵan «Álemníń jaryǵy» atty saltanatty merekelík kontsert ūıymdastyryldy.
Merekelík keshke qala ákímí Darhan Satybaldy qatysty, – dep habarlaıdy aqshamnews.kz tílshísí.
Saltanatty jıynǵa mádenıet, bílím beru, medıtsına, energetıka, kásípkerlík jáne qoǵamdyq qyzmet salalarynda eńbek etíp júrgen áıelder shaqyryldy.
Kontserttík baǵdarlamany ánshí Mádına Saduaqasova «Saltanat» memlekettík bı ansamblímen bírge oryndaǵan «Men qazaq qyzdaryna qaıran qalam» atty teatrlandyrylǵan kompozıtsıyamen ashty. Sonymen qatar IL Canto tobynyń oryndauyndaǵy muzykalyq nómírler men «Jańa ǵasyr» teatry akterleríníń «Áıel – sheksíz álem» atty poetıkalyq qoıylymy kórermen nazaryna ūsynyldy.
Kesh barysynda «Dos-Mūqasan» toby, Roza Rymbaeva, Tolqyn Zabırova, Dıyar Babaev, Toqtar Seríkov, Beıbít Seıdualıeva, Ábdíjappar Álqoja, Yernazar, Álı Oqapov, Qazybek Qūraıysh jáne Baǵjan Oktyabr syndy qazaq estradasynyń tanymal ónerpazdary óner kórsettí.
Muzykalyq nómírler «Saltanat» memlekettík bı ansamblíníń kórkem horeografıyalyq qoıylymdarymen úılesím tauyp, keshtíń sánín kírgízdí. Ónerpazdar sahnada áıelder qauymyn merekemen qūttyqtap, olarǵa amandyq, baq-bereke jáne shabyt tíledí.
