2026 jyly 3 335 etnıkalyq qazaq tarıhı otanymen tabysyp, qandas mártebesín aldy.
Jalpy 1991 jyldan berí respublıkaǵa 1 mln 168,2 myń etnıkalyq qazaq oraldy, – dep habarlaıdy aqshamnews.kz tílshísí.
Jyl basynan Qazaqstanǵa kelgen qandastardyń jartysy (47,8%) Qytaıdan, 43,6% – Ózbekstannan, 2,7% – Túríkmenstannan, 2% – Reseıden, 2,2% – Monǵolıyadan jáne 1,7 – basqa elderden tírkeldí.
2025 jylda eńbekke qabílettí jastaǵy etnıkalyq qonys audarushylar sany 58,1%-dy, eńbekke qabílettí jastan kíshí 33,1%-dy jáne zeınetkerler 8,8%-dy qūraıdy.
Eńbekke qabílettí jastaǵy qandastardyń íshínen bílím deńgeıí boıynsha: 13,1%-y joǵary bílímdí, 27,1%-y orta kásíbı bílímdí, 51,9%-y jalpy orta bílímdí, jáne 7,9%-ynyń bílímí joq.
Qonys audarǵan etnıkalyq qazaqtar respublıkanyń túrlí óńírleríne qonystandy.
Sonymen bírge, qandastardy qonystandyru úshín kelesídeı eńbek kúshí tapshy óńírler anyqtaldy: Aqmola, Abaı, Qostanaı, Pavlodar, Atyrau, Batys, Shyǵys jáne Soltústík Qazaqstan oblystary.
Qonystandyru óńírlerínde 2026 jylǵa arnalǵan qandastardy qabyldau kvotasy 2 281 adamdy qūraıdy. 2026 jyldyń 2 aıynyń qorytyndysy boıynsha atalǵan óńírlerge 569 qandas qonystandy.
Joǵaryda atalǵan óńírlerde qonystanǵan qandastarǵa kóshuge subsıdıya túrínde memlekettík qoldau sharalary ūsynylady – bír mezgílde otaǵasyna jáne otbasynyń árbír múshesíne 70 AEK (302,8 myń teńge) mólsherínde; tūrǵyn úı jaldauǵa jáne kommunaldyq qyzmetterge aqy tóleuge – bír jyl íshínde 15-ten 30 AEK (64,9-den 129,8 myń teńgege deıín) mólsherínde.
Jyl basynan berí 139 qandasqa túrlí qoldau sharalary kórsetíldí. Atap aıtqanda, 108 adam tūraqty jūmysqa ornalastyryldy.
Sonymen qatar eríktí qonys audarudyń tıímdílígín arttyru maqsatynda azamattardy soltústík óńírlerge qonys audaruǵa qatysatyn jūmys berushílerdí qoldau boıynsha ınstıtutsıonaldyq sharalar qabyldandy. Tūrǵyn úı satyp alu úshín ekonomıkalyq mobıldílígí sertıfıkaty 1 625 AEK nemese bír otbasyna 7 mln teńgege deıín mólsherínde bírjolǵy óteusíz negízde engízíldí.