Kóktemníń shuaqty merekesí – Ūlystyń ūly kúní Nauryz qarsańynda elímízde keń kólemde ótíp jatqan «Nauryznama» onkúndígí Ūlttyq ūlan qatarynda da erekshe serpínmen jalǵasuda. Ásírese «Ońtústík» óńírlík qolbasshylyǵyna qarasty áskerı bólímderde ūıymdastyrylǵan mazmūndy ís-sharalar ruhanı jańǵyru men ūlttyq qūndylyqtardy dárípteudíń jarqyn kórínísíne aınaldy.
Onkúndíktíń basty maqsaty – eldegí beıbítshílík pen kelísímdí nyǵaıtu, qoǵamdy ortaq qūndylyqtar tóńíregíne toptastyru, sondaı-aq ūlttyq sana men mádenı mūrany keńínen nasıhattau.
14 nauryz – Amal merekesí ayasynda áskerı qyzmetshíler Ūly Otan soǵysy men tyl ardagerleríne, Ūlttyq ūlan ardagerleríne, sondaı-aq qyzmettík míndetín atqaru kezínde qaza tapqan jauyngerlerdíń otbasylaryna arnaıy baryp, qūrmet kórsettí. Solardyń bírí – 6698 áskerı bólímíníń jauyngerlerí tájík-auǵan shekarasynda erlíkpen qaza tapqan Íshkí ásker starshınasy Qalmahan Baqbaevtyń anasy Ūrqıya ájege baryp, kóńílín sūrap, syı-sıyapat tabystady.
15 nauryz – Qaıyrymdylyq kúní de ıgí ísterge toly boldy. Áleumettík osal toptarǵa qoldau kórsetílíp, azyq-túlík sebetterí taratyldy. Sonymen qatar, 5513 áskerı bólímíníń áskerı qyzmetshílerí Ardagerler keńesímen bírlesíp, Ardagerler úıínde tūratyn otstavkadaǵy praporshchık Alekseı Antonıadıge baryp, qūrmet bíldírdí.
16 nauryz – Mádenıet jáne ūlttyq salt-dástúr kúní «Bírge kítap oqıyq!» atty taǵylymdy sharamen erekshelendí. 5547 jáne 5513 áskerı bólímderí oblystyq jáne qalalyq kítaphanalarmen bírlesíp, sarbazdar arasynda kítap oqudy nasıhattady. Kítaptar syıǵa tartylyp, úzdík oqyrmandar marapattaldy. Al 5574 áskerı bólímínde ótken ís-shara joǵary deńgeıde ūıymdastyrylyp, áskerı ortaǵa ruhanı serpílís syılady.
17 nauryz – Shańyraq kúní otbasylyq qūndylyqtardy dárípteuge arnaldy. Kópbalaly áskerı otbasylarǵa qūrmet kórsetílíp, olardyń ónegelí ómírí úlgí retínde nasıhattaldy. Sonyń bír aıǵaǵy – 5574 áskerı bólímíníń áskerı qyzmetshísí, kópbalaly ana efreıtor Aqnūr Erímbetova. Ol qyzmet pen otbasy jauapkershílígín qatar alyp júrgen jan retínde kópshílíkke tanystyryldy.
18 nauryz – Ūlttyq kıím kúní erekshe sán-saltanatymen este qaldy. Būl kúní áskerı qyzmetshíler kúndelíktí qatań áskerı formany ūlttyq naqyshtaǵy elementtermen almastyryp, túrlí chellendjder ūıymdastyrdy. Ūlttyq kıímdegí jauyngerlerdíń kelbetí áskerı ortaǵa erekshe jylulyq pen ásemdík syılady.
Aldaǵy kúnderí de onkúndík ayasyndaǵy sharalar jalǵasyn tabady. «Jańaru kúní» tsıfrlyq transformatsıya taqyrybyna arnalyp, áskerı bólímderde Ashyq esík kúnderí ótkízíledí. Ūlttyq sport kúníne oraı toǵyzqūmalaq, asyq atu, arqan tartu syndy dástúrlí oıyndardan jarystar ūıymdastyrylmaq. Nauryz merekesíne ūlasatyn būl onkúndík «Tazaru kúnímen» qorytyndylanyp, senbílíkter ótkízílíp, ońtústík óńírde aǵash otyrǵyzu jūmystary júrgízíledí.
Jalpy, Nauryznama ayasyndaǵy ís-sharalar dástúr men jańashyldyqtyń úılesímín aıshyqtap, ūlttyq mádenıet pen ruhanı qūndylyqtardyń ómírsheńdígín taǵy bír márte dáleldedí. Būl bastamalar áskerı qyzmetshílerdíń boıynda otansúıgíshtík ruhty nyǵaıtyp qana qoımaı, el bírlígí men qoǵamdyq kelísímdí odan árí bekemdeı túsude.
Qazaqstan Respublıkasy ÍÍM Ūlttyq ūlany
«Ońtústík» óńírlík qolbasshylyǵynyń baspasóz qyzmetí