Almatyda Ūlttyq kıím kúníne oraı erekshe árí áserlí ís-shara óttí. Tūrǵyndar mūz aıdynynda ūlttyq kıím kıíp shyǵyp, jappaı syrǵanady, – dep habarlaıdy aqshamnews.kz tílshísí.
Merekelík ís-shara qaladaǵy bírden úsh mūz aıdynynda — «Almaty Arena», «Halyq Arena» jáne «Olımpık» keshenderínde qatar ótíp, megapolıs tūrǵyndary men qonaqtarynyń úlken qyzyǵushylyǵyn tudyrdy.
Saǵat 16:00-den 20:00-ge deıín kelushíler úshín tegín syrǵanau múmkíndígí ūsynyldy. Qatysushylar ūlttyq kıímmen kelíp, mūz ústínde erekshe ruh qalyptastyrdy — jarqyn, áserlí jáne ūlttyq naqyshqa toly kórínís ornady.
Qonaqtarǵa tegín taǵam ūsynyldy, būl keshtíń jylylyǵyn arttyra tústí.
Qala tūrǵyndary ís-sharaǵa otbasymen, dostarymen jáne balalarymen kelíp, demalyp, estelík suretke túsíp, áserín bólístí. Kópshílík būl formattyń tyń árí shabyt syılaǵanyn atap óttí.
Būl bastama sportty dáríptep qana qoımaı, adamdardy bíríktíríp, salauatty ómír saltyn nasıhattaudyń jáne ūlttyq qūndylyqtardy ūlyqtaudyń jarqyn úlgísíne aınaldy.
