2026 jyly generatıvtí kontent tehnologıyalyq eksperımentter sanatynan bírjola shyǵyp, qūqyqtyq retteu nysanyna aınaldy, – dep habarlaıdy aqshamnews.kz tílshísí.
Eger būryn neırojelí kómegímen jasalǵan keskínder men beıneler zıyansyz tsıfrlyq qūral retínde qabyldansa, búgínde olar aqparattyq qauíp-qater faktory retínde qarastyrylady. Memleketter jekelegen eskertuler beruden mūndaı kontenttí jasau men taratudyń naqty erejelerín bekítuge kóshude. Álem elderí tańbalanbaǵan nemese adastyrushy JI-kontentke múldem tózbeushílík tanytuda:
Úndístan: Premer-mınıstr Modıdíń dıpfeıgín jasaǵany úshín qamauǵa alu.
AQSh: «Sıntetıkalyq adamdy» tańbalausyz paıdalanǵany úshín jarnama agenttígíne $5,000 aıyppūl salyndy.
Túrkıya: Mınıstrdíń jalǵan málímdemesí bar JI-beıne úshín portalǵa jyldyq aınalymnyń 5% mólsherínde aıyppūl salyndy.
Ońtústík Koreya: JI-sūhbatty belgílemegení úshín medıa kompanıyaǵa 30 mln von ($22,000) aıyppūl salyndy.
Qytaı: Júrgízushíler arasynda dúrbeleń tudyrǵan «joldyń opyryluy» turaly JI-suretter úshín blogerdíń ūstaluy.
Germanıya: Sot sheshímí: satıralyq sıpat JI-tuyndylardy tańbalau míndetínen bosatpaıdy.
BAÁ: Qoǵamdy adastyruǵa jáne ūlttyq qauípsízdíkke nūqsan keltíruge baǵyttalǵan JI beınelerín taratqany úshín ūstau sharalary júrgízíldí.
Ūlybrıtanıya: Kelísímsíz dıpfeık jasauǵa tyıym salatyn jańa zań boıynsha alǵashqy talap-aryzdar (2026 jylǵy aqpan).
Pákístan: Áskerılerdíń atynan jasalǵan «úkímettí synau» JI-audıojazbasy úshín kıberterrorızm babymen qozǵalǵan ís.
Kanada: Mıtıngílerge sebep bolǵan «ǵımarattyń qūlauy» JI- renderí úshín aıyppūl salyndy.
Frantsıya: «Versaldaǵy tártípsízdíkterdíń» JI-fotosuretterín jasap, taratqany úshín ınternet-resurs būǵattaldy.
Italıya: «Bolmysta joq eskertkíshterdíń» JI-keskínderín paıdalanǵan turıstík agenttíkke qarsy talap-aryz. Japonıya: Marqūm akterdíń JI-kóshírmesín barlyq mūragerlerdíń kelísímínsíz paıdalanu boıynsha sot talqylauy.
Sıngapur: «Shyǵanaqtyń lastanuy» turaly JI-keskínder úshín jalǵan aqparatqa qarsy ís-qımyl zańnamasy sheńberíndegí nūsqama.
Avstralıya: Professordyń JI-klonyn onyń kelísímínsíz paıdalanǵan onlaın-kurs ūıymdastyrushylaryna aıyppūl salyndy. Argentına: Polıtsıyaǵa qarsy zorlyq-zombylyqqa shaqyrǵan dıpfeık jasaǵany úshín ūstau.
Estonıya: Memlekettík organdardyń jauap beru stılín ımıtatsıyalaǵan bot ıesíne resmı eskertu jasaldy. Qazaqstanda da JI salasy endí «rettelmeıtín aımaq» emes. Kerísínshe, ony qoldanu saldary, eń aldymen, audıtorıyany adastyru qaupí tūrǵysynan qarastyrylady. 2026 jyldyń 17 nauryzynda Semeı qalasynyń tūrǵyny neırojelí jasaǵan fotosurettí taratqany úshín jauapqa tartyldy. Generatsıyalanǵan keskín tótenshe jaǵdaı turaly shynaıy habarlama retínde ūsynylyp, áleumettík jelílerde dúrbeleń tudyrǵan. Nátıjesínde - QR ÁQBtK-níń 456-2-baby (jalǵan aqparat taratu) boıynsha hattama toltyryldy.
Jalǵan aqparatqa qarsy ís-qımyl ortalyǵy medıa ókílderí men tsıfrlyq kontent jasaushylarǵa zańnama talaptaryn qatań saqtaudy, sonyń íshínde JI-kontenttí míndettí túrde tańbalaudy jáne jalǵan aqparattyń taraluyna jol bermeudí eskertedí. Azamattarǵa taratylatyn materıaldarǵa syn kózben qarap, derekkózderín tekseríp, olardyń dūrystyǵyna kóz jetkízbeı, árí qaraı taratpauǵa keńes beríledí.