Almaty qalasynda qazaq ádebıetíníń kórnektí ókílderíníń bírí, jazushy Ǵabıden Qūlahmettíń 70 jyldyǵyna arnalǵan taǵylymdy ádebı kesh ūıymdastyryldy. Taǵzym men taǵylymǵa toly ruhanı basqosu barysynda qalamgerdíń shyǵarmashylyq mūrasy keńínen nasıhattalyp, onyń esímín ūlyqtauǵa baǵyttalǵan bírqatar mańyzdy sharalar óttí, – dep habarlaıdy aqshamnews.kz tílshísí.
Ís-shara ayasynda jazushynyń úsh bírdeı kítabynyń jáne qalamger turaly estelíkter jınaǵynyń tūsauy kesíldí. Ádebı keshke zıyaly qauym ókílderí, jazushylar, aqyndar, ádebıettanushylar, oqyrmandar, sondaı-aq marqūm qalamgerdíń tuǵan-tuystary men shákírtterí qatysty. Jınalǵan kópshílík Ǵabıden Qūlahmettíń qazaq ádebıetíndegí orny men shyǵarmalarynyń kórkemdík qūndylyǵy jaıynda oı bólísíp, qalamgerdíń ónegelí ómír jolyn eske aldy.
Kesh barysynda jazushynyń balalary men «Aq jelken» jurnaly bírlesíp ūıymdastyrǵan «Aq bastau» respublıkalyq jobasynyń qorytyndysy jarıyalandy. Atalǵan joba balalar ádebıetíne jańa lep ákeludí, jas avtorlardyń shyǵarmashylyǵyn qoldaudy maqsat etedí. Ūıymdastyrushylardyń aıtuynsha, baıqauǵa elímízdíń túkpír-túkpírínen 70-ten astam talapker qatysyp, óleń, áńgíme, novella, hıkayat jáne fentezı janryndaǵy tuyndylaryn joldaǵan.
Baıqau nátıjesínde úzdík dep tanylǵan shyǵarmalar «Aq bastau» atty arnaıy jınaqqa toptastyrylyp, jaryq kórdí. Aıta keterlígí, jınaq atauy jazushy Ǵabıden Qūlahmettíń belgílí shyǵarmasymen sabaqtasyp jatyr. Būl – bír jaǵynan qalamger ruhyna taǵzym bolsa, ekínshí jaǵynan onyń ádebı mūrasyn keıíngí buynmen jalǵastyrudyń jarqyn kórínísí.
Ūıymdastyrushylardyń píkírínshe, mūndaı bastamalar jas qalamgerlerdí qoldap qana qoımaı, qazaq balalar ádebıetíníń kókjıegín keńeıtuge de yqpal etedí. Ásírese qazírgí kezeńde balalar men jasóspírímderge arnalǵan sapaly, mazmūndy shyǵarmalardyń mańyzy artyp otyrǵany belgílí. Osy tūrǵydan alǵanda, «Aq bastau» jobasy – ádebıetke jańa esímderdí ákeletín mańyzdy alańdardyń bírí.
Ǵ. Qūlahmet atyndaǵy qoǵamdyq qordyń jetekshísí Ǵazız Qūlahmettíń aıtuynsha, baıqaudyń basty maqsaty – qoǵamdaǵy ashyqtyq pen ádílettílík qaǵıdattaryn ūstana otyryp, balalar ádebıetíne qalam tartuǵa nıettí jas avtorlardy ádebı ortaǵa tartu, olardyń shyǵarmashylyq ízdenísíne serpín beru.
– Negízgí talabymyz – qoǵamdaǵy ashyqtyq pen ádílettílíktí qamtamasyz etu. Balalar ádebıetíne qalam tartqysy kelíp júrgen jańa avtorlardyń ádebı ortaǵa keluíne jol ashu, olardy yntalandyru. Jeńímpazdar búgín ǵana anyqtaldy. Baıqauda bas júlde, bírínshí oryn, ekí ekínshí oryn, úsh úshínshí oryn jáne ekí yntalandyru syılyǵy qarastyrylǵan. Barlyǵy toǵyz avtor marapattaldy. Olardyń íshínde óleń de, zamanauı tsıfrlandyru dáuíríne beıímdelgen robot turaly qyzyqty áńgímeler de bar, – dedí ol.
Ádebı keshte tek kítaptardyń tūsaukeserí ǵana emes, jazushynyń shyǵarmashylyǵy men azamattyq bolmysyn arqau etken estelíkter de aıtyldy. Qalamgerdí jaqyn bílgen qalamdastary men zamandastary onyń ádebıettegí qoltańbasyn, adamgershílík bolmysyn, ūlt ruhanıyatyna síńírgen eńbegín erekshe íltıpatpen eske aldy.
Osyndaı mazmūndy basqosular arqyly qalamger mūrasy jańasha zerdeleníp, jas ūrpaqqa nasıhattalyp keledí. Ǵabıden Qūlahmettíń 70 jyldyǵyna arnalǵan būl ádebı kesh – qazaq ádebıetíne kórsetílgen qūrmettíń, sóz óneríne degen íltıpattyń jáne jas daryndarǵa berílgen qoldaudyń jarqyn úlgísí boldy.