Qostanaı oblysyndaǵy 15 kítaptan oqyǵan 4,3 myńnan astam pedagog «Kítap oqıtyn pedagog» baıqauynyń bírínshí (mektep íshílík) íríkteu kezeńínen onlaın-test tapsyrdy, – dep habarlaıdy aqshamnews.kz tílshísí.
Baıqau 2026 jylǵy 17 nauryzda óttí jáne óńírde kítap oqu mádenıetín damytuǵa baǵyttalǵan auqymdy bastamanyń mańyzdy qadamy boldy.
«Kítap oqıtyn ūlt» jobasy 2025 jyldyń qyrkúıegínen bastap bírneshe óńírde, sonyń íshínde Qostanaı oblysynda pılottyq rejımde íske qosylǵan. Joba Qazaqstan Respublıkasy Prezıdentí Qasym-Jomart Toqaevtyń kítap oqıtyn ūltty qalyptastyru bastamasy ayasynda júzege asyryluda. Maqsaty – halyqtyń barlyq toptary arasynda tūraqty kítap oqu ádetín qalyptastyru, synı oılaudy damytu jáne kítapty bílímníń negízgí kózí retínde nasıhattau.
«Kítap oqıtyn pedagog» baǵyty mektep jáne kolledj mūǵalímderíne arnalǵan. Qatysushylar qazaq, orys jáne shetel ádebıetínen ūsynylǵan 15 shyǵarma boıynsha test tapsyrdy. Baıqau ekí lıgada – qazaq jáne orys tílderínde ótkízíldí.
Qostanaı oblysynda íríkteu kezeńíne oblystyń barlyq 20 audany men qalasynan 4365 pedagog qatysty. Onyń íshínde 1549-y qazaq lıgasynda, 2816-sy orys lıgasynda. Onlaın-test pedagogtarǵa óz bílímderín tereń kórsetuge múmkíndík berdí.
Kezeń jeńímpazdary dıplom, sertıfıkat aldy jáne audandyq, oblystyq baıqaularǵa qatysuǵa joldama ıelendí. Olardyń qatarynda Jítíqara polıtehnıkalyq kolledjíníń arnaıy pánder oqytushysy Farıza Ersaınovna Tokkabulova bar:
«Kítap oqıtyn ūlt» jobasyna qatysu men úshín shyǵarmashylyq jańalyq boldy. Būl qazírgí zamanda kítap oqudyń rólín jańasha túsínuge, qabíletímdí ashuǵa jáne áríptesterímdí shabyttandyruǵa múmkíndík berdí. Dıplom alu – men úshín zor qūrmet árí alǵa basuǵa úlken yntalandyru. Ūıymdastyrushylarǵa kítap oqu mádenıetín nasıhattauǵa baǵyttalǵan osyndaı mańyzdy bastama úshín alǵys aıtamyn».
Qostanaı qalasynyń №31 orta mektebíníń qazaq tílí men ádebıetí pání mūǵalímí Saduaqasova Lyazzat Temírhanqyzy:
«Osyndaı baıqauǵa qatysu men úshín úlken tájírıbe jáne shynaıy shabyt boldy. Qazaq tílí men ádebıetí mūǵalímí retínde kítaptyń jas ūrpaq tárbıesíndegí erekshe rólín jaqsy túsínemín. Būl joba maǵan óz bílímímdí tereńdetumen qatar, oqushylarda kítap oquǵa degen qyzyǵushylyqty arttyrudyń jańa ádísterín úırenuge múmkíndík berdí. Ár kezeń ózímdí synap, kásíbı tūrǵyda ósuge jol ashty. Eń mańyzdysy – joba ūstazdardy ortaq qūndylyq tóńíregínde bíríktírdí jáne kítap arqyly ruhanı baıytuǵa yqpal ettí. Kítap oqıtyn pedagog – kítap oqıtyn ūlttyń negízí ekeníne senemín. Osyndaı ıgí bastamalardyń jalǵasa beruín qalaımyn.»
Baıqaudyń kelesí kezeńderí (audandyq jáne oblystyq) 2026 jyldyń sáuír aıynda ótedí. Qorytyndysy boıynsha óńírdíń úzdík kítap oqıtyn pedagogtary anyqtalady.
Jobany «Amanat» partıyasynyń qoldauymen «Kítap oqıtyn ūlt – Chıtayushchaya natsıya» qoǵamdyq qory jáne Qostanaı oblysy ákímdígí júzege asyruda. Óńírlík demeushí – «Olja Agro» JShS agroholdıngí.