7 qyrkúıekten bastap qazaqstandyqtar BJZQ-daǵy zeınetaqy jınaqtaryn jeke qorlarǵa audara alady, – dep habarlaıdy aqshamnews.kz tílshísí.
Sarapshylar asyǵys sheshím qabyldamauǵa keńes beredí. Aldymen kompanıyalardyń ūsynystaryn zerttep, olardyń tabystylyǵy men táuekelderín salystyru qajet.
Zeınetaqy jınaǵyn jeke kompanıyaǵa BJZQ saıty arqyly audaruǵa bolady. Ol úshín elektrondy tsıfrlyq qoltańba qajet. Basqarushyny tańdau qıynyraq. Saıtta kompanıyalardy, olardyń portfelderí men tabystylyǵyn salystyru múmkíndígí bar. Qazírgí tańda kópshílígíníń tabystylyǵy ınflyatsıyadan sál ǵana joǵary.
Jınaǵy az salymshylar úshín memlekettík qordan jeke qorǵa auysudyń áserí mardymsyz boluy múmkín.
"Barlyq jūmyrtqany bír sebetke salmau kerek degen sóz bar. Men ártúrlí qorlar arasynda tańdau jasauǵa, bálkím jınaqtyń bír bólígín BJZQ-da qaldyruǵa keńes berer edím. Eger basqaru nemese tabystylyq kóńílden shyqpasa, qarajatty BJZQ-ǵa qaıtaruǵa bolady. Eń aldymen, kompanıyanyń qalaı jūmys ísteıtíníne jáne qarajatty qaıda ınvestıtsıyalaıtynyna nazar audaru kerek", - dedí sarapshy Meruert Mahmūtova.
Zeınetaqy jınaǵyn basqaruda joǵary tabystylyq qana emes, tūraqtylyq ta mańyzdy. Sarapshylar jeke basqarushylar konservatıvtí jáne tūraqty strategıyadan bastap, tabysy joǵary, bíraq táuekelí de kóp ártúrlí nūsqany ūsynady dep boljaıdy. Sondyqtan sharttar men kelísímshartty mūqıyat oqyp shyǵu qajet.
"Paıyzǵa emes, brendke jáne tūraqtylyqqa qarańyzdar. Olardyń portfelín, yaǵnı qarajatty qaıda salatynyn kóruge erínbeńízder. Eger olar "Bíz Apple, Tesla, Google-ge salamyz, bárí jaqsy bolady" dese, būl – aldau. Erteń zeınetke shyqqanda jeke ūshaqpen ūshasyzdar degen – jarnamalyq aıla", - dedí qarjyger Rasul Rysmambetov.
Basty sūraq: zeınetaqy jınaǵyn jeke basqarushyǵa seníp tapsyru qanshalyqty qauípsíz? Qarjygerlerdíń aıtuynsha, zeınetaqy aktıvterí naryǵy qatań retteledí. Aqshany joǵaltu qıyn, bíraq tabystylyq kútkennen tómen boluy múmkín. Mūndaı jaǵdaıda basqarushyny auystyruǵa bolady.
Taǵy bír mańyzdy másele – komıssıya. Zań boıynsha jeke basqarushy alynǵan ınvestıtsıyalyq tabystyń 7,5 paıyzyna deıín komıssıya ūstauy múmkín. Sondyqtan kompanıya tańdaǵanda tek uáde etílgen tabysqa emes, salymshynyń qolynda qansha aqsha qalatynyna da nazar audarǵan jón.
7 qyrkúıekten bastap qazaqstandyqtar zeınetaqy jınaqtaryn jeke basqarushylarǵa tolyq audara alady. Alaıda būl jańa múmkíndíkpen bírge Qazaqstanda jınaqtardy qorǵaıtyn eskí mehanızm alyp tastaldy.