Reseı Federatsıyasynan kelgen halyqaralyq baıqaushylar bír kúnde shamamen 20 saılau uchaskesíne bardy, dep habarlaıdy aqshamnews.kz tílshísí.
Qazaqstannyń būqaralyq aqparat qūraldary men saılau komıssıyalary Qūryltaı saılauyn tūraqty árí jedel aqparattyq súıemeldeudí qamtamasyz ettí. Kúní boıy dauys beru barysy men azamattardyń belsendílígí turaly eldíń ár óńírínen aqparat úzdíksíz kelíp otyrdy. Sonyń arqasynda saılaushylar men halyqaralyq baıqaushylar saılau barysyn ís júzínde naqty uaqyt rejımínde baqylauǵa múmkíndík aldy. Aqparattyq súıemeldeudíń joǵary deńgeıde bolǵanyn Lenıngrad oblysynyń saılau komıssıyasynyń tóraǵasy Mıhaıl Lebedınskıı málímdedí.
Mıhaıl Lebedınskııdíń halyqaralyq baıqau salasynda mol tájírıbesí bar: 2013 jyldan berí ol TMD elderíndegí saılau nauqanyna sarapshy árí baıqaushy bolyp qatysyp keledí. Onyń aıtuynsha, Qazaqstan būǵan deıín de saılaudy joǵary deńgeıde ūıymdastyrumen kózge túsken. Alaıda būl joly saılaushylarǵa jasalǵan jaǵdaı men ózgerís erekshe baıqalǵan.
«Men Qazaqstanǵa bírneshe ret keldím, kelgen saıyn saılaudyń joǵary deńgeıde ūıymdastyrylǵanyn únemí aıtyp júretínmín. Saılau komıssıyasynyń múshelerín oqytu men bíryńǵaı standartty qalyptastyru boıynsha kóp jūmys ístelgení kóríníp tūr. Būl joly saılaushylarǵa kóńíldíń aıryqsha bólíngení quantty: arnaıyn ázírlengen baǵyttaǵyshtar jūrtqa uchaskení tez tabuǵa kómektestí. Bír qaraǵanda ūsaq-túıek bolyp kórínetín osyndaı dúnıeler dauys berudí aıtarlyqtaı yńǵaıly etedí», – dep óz oıymen bólístí Mıhaıl Lebedınskıı.
Reseı Federatsıyasynan kelgen halyqaralyq baıqaushylar bír kúnde shamamen 20 saılau uchaskesíne bardy. Olar dauys beru barysyn ǵana emes, sonymen qatar uchaskelerdíń jabyluyn, paıdalanylmaǵan byulletenderdíń joıyluy men dauysty sanau protsesín de baqylaǵan.
Spıker saılaudyń aqparattyq súıemeldeu jaǵyna da toqtaldy. Dauys beru barysy men azamattardyń belsendílígí turaly jańalyqty būqaralyq aqparat qūraldary, Ortalyq saılau komıssıyasy men aumaqtyq saılau komıssıyasy úzbeı jarıyalap otyrdy. Sonyń arqasynda saılaushylar men halyqaralyq baıqaushylar kúní boıy barlyq óńírden jedel aqparat alyp otyrǵan.
Mıhaıl Lebedınskıı Ortalyq, aumaqtyq jáne uchaskelík saılau komıssıyasynyń músheleríne kásíbı árí ashyq jūmys ístegení úshín alǵys bíldírdí. Onyń píkírínshe, saılau qatań baqylanatyn protsess ǵana emes, sonymen bírge árkím óz oıyn erkín bíldíretín mańyzdy qoǵamdyq oqıǵa bolyp qala beruí tıís.