Saltanatty ís-sharaǵa 21 laureat, sondaı-aq olardyń ūstazdary men tálímgerlerí shaqyryldy, dep habarlaıdy aqshamnews.kz tílshísí.
Prezıdent Qasym-Jomart Toqaev Aqordada halyqaralyq pán olımpıadalarynda jeńímpaz atanyp, júldelí oryndarǵa ıe bolǵan oqushylarmen jáne studenttermen kezdestí.
Saltanatty ís-sharaǵa 21 laureat, sondaı-aq olardyń ūstazdary men tálímgerlerí shaqyryldy. Fızıka, hımıya, bıologıya, matematıka, ınformatıka, geografıya jáne lıngvıstıka pánderínen bedeldí bílím saıysynda top jarǵan jeńímpazdardyń altauy – altyn medal, on bírí – kúmís, tórteuí – qola medal ıegerlerí.
Prezıdent bílím saıysynda úzdík nátıjege qol jetkízgen daryndy jastardy jarqyn jeńísímen qūttyqtap, olarǵa shynaıy rızashylyǵyn bíldírdí.
– Árqaısyńyz álemníń eń zıyatker oqushylarymen básekege túsíp, bedeldí bílím dodalarynda top jardyńyzdar. Kók Tuymyzdy bıíkke kóteríp, elímízdíń abyroı-bedelín arttyruǵa mol úles qosyp júrsízder. Bíz sízderdí maqtan tūtamyz. Qazaqstannyń jarqyn bolashaǵy – oıy ūshqyr, bílímdí, daryndy jastardyń qolynda. Men Memleket basshysy retínde báríńízge zor rızashylyǵymdy bíldíremín. Sízder el maqtanyshy degen atqa laıyqsyzdar! – dedí Memleket basshysy.
Qasym-Jomart Toqaev tabandy eńbek, úzdíksíz ízdenumen jeńíp alǵan ár medaldíń baǵasy qymbat, mańyzy zor ekenín atap óttí.
– Saǵattap oqu, aılar boıy daıyndyq júrgízu, jyldar boıy bıík maqsatqa ūmtylu úshín, eń aldymen, qajyrly qaırat pen myqty kúsh-jíger kerek. Ūly Abaı da «Úsh-aq nárse adamnyń qasıetí: ystyq qaırat, nūrly aqyl, jyly júrek» dep ósıet aıtty. Sízder árqaısyńyz kóp ūzamaı bílíktí ınjener, kórnektí ǵalym, myqty maman bolasyzdar. Jańa tehnologıyalardy oılap tauyp, elímízdíń órkendeuíne, álemníń damuyna yqpal etetín jańalyq ashasyzdar. Men būǵan kámíl senemín, – dedí Prezıdent.
Memleket basshysynyń aıtuynsha, Qazaqstan – naǵyz daryndy jastardyń elí. Ūl-qyzdarymyz barlyq baǵytta, ásírese, bílím salasynda úzdíkter qatarynan kóríníp keledí.
– Bıyl oqushylarymyz 44 halyqaralyq olımpıada men ǵylymı saıysqa qatysyp, myńnan astam medal jeńíp aldy. Onyń 200-den astamy – altyn medal. Mūny tamasha jetístík deuge bolady. Osy tūsta halyqaralyq fızıka olımpıadasynda keremet óner kórsetken oqushylardy erekshe atap ótkím keledí. Bedeldí básekege qatysqan bes talapkerímízdíń beseuí de altyn medal alyp, jeńímpaz atandy. Būl – būryn-sońdy bolmaǵan bíregeı kórsetkísh. Jalpy, bíz barlyq baǵyttar boıynsha osyndaı úzdík nátıjege ūmtyluymyz kerek. Qazaqstan jastarynyń áleuetí oǵan tolyq jetedí, – dedí Qasym-Jomart Toqaev.
Prezıdent qazír elímíz tarıhı órleu kezeńíne qadam basqanyna nazar audardy.
– Bíz bír el, bír halyq bolyp auqymdy reformalardy júzege asyrdyq. Jańa Konstıtutsıyamyzdy qabyldadyq. Elímízdíń bas qūjatynda ǵylym men bílímge, ınnovatsıyaǵa basymdyq berdík. Eń bastysy, jańa Konstıtutsıya óskeleń ūrpaqtyń ıgílígí úshín jazyldy. Keshe ǵana tarıhymyzda tūńǵysh ret Qūryltaı saılauy óttí. Būl saılau sáttí, mínsíz ūıymdastyryldy dep aıtsaq, qate bolmas. Osy múmkíndíktí paıdalanyp, búkíl halqymyzǵa azamattyq kemeldík tanytyp, jańaru strategıyamyzdy qoldaǵany úshín myń da bír alǵysymdy aıtamyn. Saılau kezínde bír top baıqaushylar, sonyń íshínde halyqaralyq baıqaushylar óte tıímdí jūmys ístedí. Olarǵa da zor rızashylyǵymdy bíldíremín. Sondaı-aq Ortalyq saılau komıssıyasynyń músheleríne rahmetímdí aıtamyn. Olar óte tabandy qyzmet atqardy, – dedí Qasym-Jomart Toqaev.
Osy oraıda Prezıdent memleket tarapynan barsha daryndy jastarǵa árdaıym qoldau kórsetíletínín, jastardyń sapaly bílím alyp, jan-jaqty damuy úshín barynsha jaǵdaı jasalatynyn jetkízdí.
– Álem tez ózgeríp jatqany sonshalyq, tayau keleshekte ne bolaryn eshkím tap basyp aıta almaıdy. Bíraq bílímge qūshtarlyq, óz kúshíńe senu, tabandy eńbek kez kelgen uaqytta tabysqa jeteleıtínín ūmytpauymyz kerek. Keleshek turaly bír nársení senímmen aıtuǵa bolady – túbí adam kapıtalyn damytuǵa jáne jańa tehnologıyalardy ekonomıka men qoǵamnyń barlyq salasyna engízuge basa mán bergen elder ozady. Qazaqstannyń qarqyndy damuyn qamtamasyz etu úshín bıyl «Tsıfrlandyru jáne jasandy ıntellekt jyly» dep jarıyalandy. Sízder, talantty jastar osy jasampaz úderísterdíń aldyńǵy shebínde júresízder. Qazaqstan jastary Sízderge qarap boı túzeıdí, úlgí alady. Bílím men ǵylym, ınnovatsıya men ozyq tehnologıya – búgíngí dáuírdíń basty qaruy. Jahandyq básekede bílímdí, zıyatker elder ǵana alǵa shyǵady. Sondyqtan men sízderdí «Qazírgí zamannyń naǵyz batyrlary» dep sanaımyn. Men qazaq jastarynyń otanshyl, bílímpaz, eńbekqor bolǵanyn qalaımyn. Olar elge janashyr, tabıǵatqa qamqor, naǵyz adal azamat boluyn tíleımín. Atap aıtqanda, eríktílerdíń eńbegín joǵary baǵalaımyn, qoldaımyn. Men jastarǵa senemín! – dedí Memleket basshysy.
Qasym-Jomart Toqaev óskeleń ūrpaqtyń talantyn shyńdap, bílím bergen ūstazdar qauymyna alǵys aıtty.
– Qazír bízdíń ortamyzda sanaly ūrpaq tárbıelep, olardy úzdíkter qataryna qosqan ūlaǵatty ūstazdar otyr. Sízderdíń eren eńbekteríńíz zor qūrmetke laıyq. Qabílettí balalardy oqytyp, olardy halyqaralyq jarystarǵa dayarlaıtyn pedagogterge shynaıy rızashylyǵymdy bíldíremín. Būl – eń ízgí ís. Sízderdíń eńbekteríńízdí memleket míndettí túrde eskeredí. Úkímet pen óńír basshylaryna osyndaı tapsyrma beríledí, – dedí Prezıdent.
Memleket basshysy saltanatty rásímde halyqaralyq pán olımpıadalarynda altyn, kúmís jáne qola medal ıelengen oqushylar men studentterge sáıkesínshe 1500, 1000 jáne 500 aılyq eseptík kórsetkísh kólemínde qarjylaı syıaqysy bar sertıfıkattardy tabystady.
Al shákírtterí bedeldí halyqaralyq jarysta top jarǵan ūstazdar men tálímgerler joǵary memlekettík nagradalarmen marapattaldy. Atap aıtqanda, Memleket basshysy Qasym-Jomart Toqaevtyń Jarlyǵymen bílím beru salasyndaǵy asa úzdík jetístíkterí jáne Qazaqstan Respublıkasyna síńírgen aıryqsha eńbegí úshín Astana qalasyndaǵy Nazarbaev zıyatkerlík mektebíníń mūǵalímí Meıramgúl Kenjehanovaǵa, Almaty qalasyndaǵy №134 lıtseı mūǵalímí Irına Nesterenkoǵa – «Qūrmet» ordení, «Edlight Academy» ádískerí Janbolat Jolgeldıevke, Qaraǵandy qalasyndaǵy Nazarbaev zıyatkerlík mektebíníń mūǵalímí Qarlyǵash Joldybaevaǵa, «Haileybury Almaty» mektebíníń mūǵalímí Vladımır Jukke, Óskemen qalasy Bílím-ınnovatsıya lıtseıíníń mūǵalímí Aıgúl Seıítdáuletke – «Eren eńbegí úshín» medalí, Qyzylorda qalasyndaǵy Bílím-ınnovatsıya lıtseı-ınternatynyń mūǵalímí Batyr Jarqynǵa, Taldyqorǵan qalasyndaǵy №24 lıtseı mūǵalímí Meruert Abaevaǵa, Pavlodar qalasyndaǵy Bílím-ınnovatsıya lıtseı-ınternatynyń mūǵalímí Oljas Ámzeevke, Almaty qalasyndaǵy Respublıkalyq fızıka-matematıka mektebíníń mūǵalímí Baqyt Mamyshevke «Shapaǵat» medalí beríldí.
