Qazaqstan Respublıkasy Bas prokuraturasy qūqyqtyq statıstıka jáne arnaıy esepke alu jóníndegí komıtetíníń qylmystyq qauíp-qaterlerdíń jáne qoǵamdyq qauípsízdíktíń táuekelderín boljau ortalyǵy WhatsApp messendjeríne qatysty jańa kıberqater turaly eskertedí.
Sheteldík derekkózderdíń málímetíne sáıkes kıberalayaqtar WhatsApp akkaunttaryn basyp aludyń jańa qylmystyq shemasyn qoldanuda.
Būl ádís GhostPairing dep atalady jáne parolderdí būzudy, SIM-kartalardy auystyrudy nemese kúrdelí tehnıkalyq shabuyldardy qajet etpeıdí. Alayaqtar WhatsApp-qa zańdy túrde, qosymsha qūrylǵylardy baılanystyru funktsıyasyn paıdalanu arqyly qol jetkízedí. Stsenarııí qarapaıym. Paıdalanushyǵa Facebook nemese WhatsApp atynan jasyrynǵan habarlama jíberíledí, ol Facebook pen WhatsApp ınterfeısín vızualdy túrde qaıtalaıtyn jalǵan paraqshalarǵa baǵyttaıdy. Kontentke qoljetímdílíktí rastau úshín feık-paraqsha telefon nómírí men rastau kodyn engízudí ūsynady, osydan keıín alayaq avtomatty túrde jábírlenushíníń akkauntyna senímdí qūrylǵy retínde qosylyp, WhatsApp-qa tolyq qol jetkízedí (habarlamalardy oqu, medıafaıldardy qarau, baılanystar tízímí, habarlama jíberu, fotogalereyaǵa qoljetímdílík).
Būl rette telefon ádettegídeı jūmys ísteı beredí jáne kúdík tudyrmaıdy. WhatsApp-ty basyp aluyn anyqtaudyń jalǵyz joly - "Baılanystyrylǵan qūrylǵylar" bólímín qolmen tekseru. Kez kelgen belgísíz qosylu akkaunttyń būzylǵanyn kórsetedí jáne dereu joıyluy tıís. Polıtsıya qyzmetkerlerí kıberqauípsízdík talaptaryn saqtauǵa shaqyrady. Belgísíz kírís habarlamalarǵa, qońyraularǵa jáne ár túrlí habarlandyrularǵa mūqıyat boludy eskertedí.
WhatsApp kodyn bógde paraqshalarǵa engízbeuge, ekí faktorly autentıfıkatsıyany paıdalanuǵa akkauntyńyzdyń belsendílígín tūraqty túrde tekseríp otyruǵa keńes beredí.