Astana jeńíl atletıkadan jabyq keshendegí álem chempıonatyn qabyldaıtyn qala bolyp tańdaldy. Būl sheshím Polshanyń Torun qalasynda ótken World Athletics keńesíníń otyrysynda resmı túrde jarıyalandy, dep habarlaıdy Aqshamnews.kz tílshísí.
Qazaqstan astanasy 2030 jyly jeńíl atletıkadan jabyq keshendegí álem chempıonatyn ótkízedí. Álemdík doda 15-17 nauryz aralyǵynda ótedí. Būl aqparat World Athletics jarystar kúntízbesínde de kórsetílgen.
World Athletics keńesíníń Torundaǵy otyrysynda 2028 jáne 2030 jyldardaǵy bírqatar írí turnırlerdíń qojaıyn elderí de belgílí boldy. Atap aıtqanda, 2028 jylǵy jabyq keshendegí álem chempıonaty Úndístannyń Odısha shtatynda ótedí.
Sondaı-aq halyqaralyq federatsıya 2028 jylǵy sporttyq júrísten komandalyq álem chempıonaty Qytaıdyń Hefeı qalasynda ūıymdastyrylatynyn jarıyalady.
Aıta keteıík, Astanada būǵan deıín de jeńíl atletıkadan írí halyqaralyq jarystar ótken. Atap aıtqanda, 2023 jyly Azıya chempıonaty ūıymdastyrylsa, 2024 jáne 2025 jyldary World Indoor Tour Gold serıyasynyń kezeńderí qabyldandy.