Almatyda dárígerler salmaǵy shamamen 25 kelí bolatyn alyp ísíktí sáttí alyp tastap, nauqastyń ómírín saqtap qaldy. Mamandar būl jaǵdaı der kezínde tekseríludíń jáne dálelsíz em-domǵa senbeudíń qanshalyqty mańyzdy ekenín taǵy bír ret kórsettí, – dep habarlaıdy aqshamnews.kz tílshísí.
Densaulyq saqtau mınıstrlígíníń málímetínshe, 1957 jyly tuǵan áıel adamnyń qūrsaq quysynda bírneshe aı boıy kólemí ūlǵaıyp kelgen ísík anyqtalǵan. Onyń salmaǵy shamamen 25 kelíge jetken.
Nauqas osy uaqytqa deıín dástúrlí emes em túrleríne júgíníp, bıologıyalyq belsendí qospalar qabyldaǵan. Alaıda soǵan qaramastan ísík óse bergen. Tuystarynyń aıtuynsha, áıel óz jaǵdaıyn jasyryp kelgen, típtí BBQ satyp alu úshín nesıe de rásímdegen.
Keıín ol Almaty onkologıyalyq ortalyǵyna júgíníp, onkohırurgıya bólímshesíníń meńgerushísí Nūrlan Baltaevtyń qarauyna túsken. Kompyuterlík tomografıya nátıjesínde qūrsaq quysy men kíshí jambasta kólemí 55×35 santımetr bolatyn alyp túzílís bary anyqtalǵan. Dárígerlerdíń aıtuynsha, ísík ís júzínde búkíl qūrsaq quysyn alyp jatqan.
Ota shamamen 2–2,5 saǵatqa sozylǵan. Kúrdelí hırurgıyalyq aralasu barysynda ísík qūrsaq quysynyń artqy keńístígínen alynyp tastalǵan. Operatsıyany Nūrlan Baltaev pen onyń assıstentí Ǵalym Sarmash júrgízgen.
Alynǵan ísíktíń salmaǵy 25 kelíge juyq bolǵan. Gıstologıyalyq zertteu qorytyndysy boıynsha nauqastan nekroz oshaqtary bar qūrsaq quysy artyndaǵy dedefferentsıyalanǵan lıposarkoma anyqtalǵan. Būl derttíń qaterlí ísík ekenín rastaǵan.
Qazírgí uaqytta nauqas hımıoterapıya kursynan ótíp jatyr jáne mamandardyń tūraqty baqylauynda.
Dárígerler būl jaǵdaı dárígerge qaraludy keshíktíru men dálelí joq em tásílderíne senudíń qanshalyqty qauíptí ekenín aıqyn kórsetetínín aıtady. Mamandar onkologıyalyq aurularmen kúreste uaqytyly dıagnostıka sheshushí ról atqaratynyn eskerttí.