Venesuelanyń uaqytsha bılígí AQSh-qa 30–50 mıllıon barrel mūnaı jetkízuge kelístí, dep habarlaıdy Aqshamnews.kz tílshísí.
Būl turaly AQSh prezıdentí Donald Tramp Truth Social áleumettík jelísíndegí paraqshasynda málímdedí. Onyń aıtuynsha, Venesueladan tasymaldanatyn mūnaı naryqtyq baǵamen satylady, al odan túsken qarjy tíkeleı óz baqylauynda bolady.
«Būl kelísím ekí el halqynyń da múddesíne saı jūmys ísteuí tıís», – dep jazdy Donald Tramp.
AQSh prezıdentí atalǵan kelísímdí jedel íske asyrudy energetıka mınıstrí Krıs Raıtqa tapsyrǵan. Josparǵa sáıkes, mūnaı arnaıy tankerler arqyly AQSh aumaǵyna tíkeleı jetkízíledí.
Jetkízu protsesí mamandandyrylǵan kemelermen júzege asyrylady. Olar mūnaıdy tíkeleı túsíru termınaldaryna aparyp, logıstıkany jedeldetuge múmkíndík beredí.
Būǵan deıín Donald Tramp amerıkalyq áskerılerdíń Karakasta júrgízílgen túngí operatsıya barysynda Venesuelanyń būrynǵy basshysy Nıkolas Maduro men onyń jūbaıyn ūstap, elden alyp shyqqanyn málímdegen bolatyn. Aqparat kózderí áskerı jáne strategıyalyq nysandarǵa, sonyń íshínde parlament ǵımaratyna soqqylar jasalǵanyn habarlady.
Sondaı-aq AQSh prezıdentí Venesuelada bılík auysqannan keıín eldí uaqytsha basqaru míndetín AQSh óz moınyna alatynyn aıtqan. Keıín Venesuela Joǵarǵy soty būrynǵy atqarushy vıtse-prezıdent Delsı Rodrıgestí uaqytsha memleket basshysy etíp taǵaıyndady.