Búgín «Medeu» bógetíníń baspaldaǵy taǵy da erík-jígerdíń, tózímdílík pen sporttyq ruhtyń alańyna aınaldy, – dep habarlaıdy aqshamnews.kz tílshísí.
Almaty qalasynyń Sport basqarmasy ókílderíníń málímetínshe, dástúrlí jyl saıynǵy júgíru jarysyna Almaty tūrǵyndary men qala qonaqtarynan shamamen 3 myń adam qatysty. Būl doda búgínde Almatydaǵy eń tanymal būqaralyq sporttyq ís-sharalardyń bíríne aınalǵan.
Jarysqa balalar, jastar, eresekter, tájírıbelí sportshylar jáne óz kúshín alǵash ret synap kórgísí kelgen qatysushylar shyqty. Olar 100, 200 jáne 500 metr qashyqtyqtarǵa júgírse, eń tózímdí qatysushylar jyl saıyn naǵyz erík-jíger synaǵyna aınalatyn ańyzǵa aınalǵan 842 satyny baǵyndyrdy.
Bírí úshín būl jarys júldelí orynǵa talas bolsa, endí bírí úshín óz-ózín jeńudíń sımvolyna aınaldy. Osyndaı jarystar būqaralyq sporttyń qoljetímdílígín arttyryp, jasyna jáne daıyndyq deńgeıíne qaramastan myńdaǵan adamdy ortaq maqsatqa bíríktíredí.
«Medeu» bógetíníń baspaldaǵyna júgíru jarysy jyl saıyn auqymyn keńeıtíp keledí. Salauatty ómír saltyn tańdaǵan tūrǵyndar sany artyp, olar dostarymen jáne otbasylarymen bírge jarysqa qatysyp, sporttyq básekení úlken qalalyq merekege aınaldyruda.
Būqaralyq sportty damytu Almatynyń negízgí basymdyqtarynyń bírí bolyp qala beredí. Qalada árbír tūrǵynnyń sportpen aınalysuyna qolaıly jaǵdaı jasau jáne osyndaı ís-sharalardy qalalyq mádenıettíń ajyramas bólígíne aınaldyru baǵytyndaǵy jūmystar júıelí túrde jalǵasuda.