Qazaqstan Respublıkasy Ūlttyq ūlanynyń «Ońtústík» óńírlík qolbasshylyǵyna qarasty áskerı bólímderínde «Máńgílík sapta» atty eske alu ís-sharasy ūıymdastyryldy. Atalǵan shara 2022 jylǵy Qańtar oqıǵasy kezínde qaza tapqan Ūlttyq ūlan sarbazdary – qatardaǵy Aıbat Amanov pen Madıyar Qaısarovty eske aluǵa arnaldy.
Ís-shara ayasynda áskerı qyzmetshíler qaza bolǵan sarbazdardyń erlígíne taǵzym etíp, eskertkísh taqtalarǵa gúl shoqtaryn qoıdy, olardyń Otan aldyndaǵy adal qyzmetí men batyldyǵyn bír mınut únsízdíkpen eske aldy. Áskerı bólímderde estelík sózder aıtylyp, patrıottyq ruhtaǵy tárbıelík jūmystar júrgízíldí.
Sonyń íshínde Taldyqorǵan qalasynda ornalasqan 5514 áskerı bólímínde ótken ís-shara mazmūndy árí taǵylymdy túrde ūıymdastyryldy. Jeke qūram sapqa tūrǵyzylyp, qaza tapqan jauyngerlerdíń esímderí qūrmetpen atalyp óttí. Taǵzym etu sharasyna Ūlttyq ūlannyń ardagerlerí jáne mektep oqushylary da qatysty.
5514 áskerı bólímíníń komandırí polkovnık Amır Mansurov:
-Aıbat Amanov pen Madıyar Qaısarov – áskerı antqa adaldyqtyń, Otanǵa degen shynaıy súıíspenshílíktíń jarqyn úlgísí. Olardyń erlígí men janqıyarlyǵy Ūlttyq ūlannyń árbír áskerı qyzmetshísíníń jadynda máńgí saqtalady. Bíz batyr sarbazdarymyzdyń ruhy aldynda bas ıemíz. Eldíń íshkí tynyshtyǵy men qauípsízdígín saqtau – bízdíń qasıettí boryshymyz», – dep atap óttí.
Aıta ketu kerek, «Máńgílík sapta» ís-sharasy Ūlttyq ūlannyń jeke qūramyna patrıottyq tárbıe beru, qaza tapqan sarbazdardyń erlígín ūlyqtau jáne áskerı qyzmettíń mańyzyn arttyru maqsatynda tūraqty túrde ótkízílíp keledí.