Ūlttyq ūlannyń 5571 áskerı bólímíníń serjanty Damır Naǵalıev ákesíne bergen uádesín oryndau úshín velosıpedpen 900 shaqyrymnan astam joldy júríp óttí, – dep habarlaıdy aqshamnews.kz tílshísí.
Būl sapar – tek sporttyq jetístík emes, áke amanatyna degen adaldyqtyń, otbasy qūndylyǵyna degen qūrmettíń jáne áskerı qyzmetshíge tán tabandylyqtyń jarqyn kórínísí.
Keńes Odaǵynyń Batyry, gvardıya polkovnıgí Bauyrjan Momyshūly atyndaǵy 5571 áskerı bólímínde qyzmet etetín serjant Damır Naǵalıev kópten berí ákesíníń armanyn júzege asyrudy maqsat etken. Ákesí kezínde Jetísaıdan Saqanǵa deıín velosıpedpen sapar shegudí armandaǵan, bíraq oryndauǵa múmkíndík bolmaǵan.
Osy armandy áke amanaty retínde qabyldaǵan áskerı qyzmetshí eńbek demalysyn tolyqtaı osy maqsatqa arnady. Ol Almaty qalasynan Jetísaıǵa deıín 900 shaqyrymnan astam qashyqtyqty segíz kún íshínde velosıpedpen eńserdí.
- Ákemdí raıynan qaıtaryp aldymen būl joldyń qanshalyqty qıyn ekenín ózím kóríp, bílgím keldí. Sol sebeptí eń aldymen ózím júríp ótudí jón kórdím. Ákemnen rūqsat alyp, demalysqa shyǵar aldynda velosıped satyp aldym. 1 shílde kúní túngí saǵat 02:00-de eshqandaı daıyndyqsyz jolǵa shyqtym, - deıdí Damır Naǵalıev.
Sapar barysynda ūlandyq jauynger jauyn-shashynǵa, qatty jelge jáne kúrdelí asularǵa qaramastan díttegen jeríne aman-esen jettí. Eń ūzaq kúndík júrísí – 230 shaqyrymdy qūraǵan.
Damırdíń aıtuynsha, áskerı qyzmette qalyptasqan tártíp, tózímdílík pen jauapkershílík, sondaı-aq otbasy men áríptesteríníń qoldauy barlyq qıyndyqty eńseruge kúsh bergen.
Būl sapar – tek ūzaq qashyqtyqty baǵyndyru emes. Būl - áke amanatyna degen qūrmettíń, berílgen uádege adaldyqtyń jáne áskerı qyzmetshí ruhynyń aıqyn úlgísí. Osyndaı ónegelí ís jastarǵa otansúıgíshtík pen otbasylyq qūndylyqtardyń mańyzyn dárípteıdí.