Íle-Alatau memlekettík ūlttyq tabıǵı parkíne 15 kamera ornatylyp, orman órtímen kúresetín 32 adamnan tūratyn jasaq qūrylyp, jańa stantsıya paıdalanuǵa beríldí, – dep habarlaıdy aqshamnews.kz tílshísí.
Órt qaupí joǵary mausym bastalǵaly berí mūnda bír shaǵyn órt tírkelgen. Óńírlík kommunıkatsıyalar qyzmetínde Íle-Alatau memlekettík ūlttyq tabıǵı parkí ormandy qorǵau, molyqtyru men qalpyna keltíru bólímíníń basshysy Raıhan Mūhamedjanova órt jıíleıtín osy mausymǵa qanshalyqty dayar otyrǵandaryn bayandap berdí.
Onyń aıtuynsha, mausym bastalysymen tabıǵı aumaqqa kelushíler sany bírneshe esege artyp, memlekettík ınspektorlarǵa túsetín júkteme de edáuír artady eken. Olar tabıǵatty paıdalanu erejesíníń saqtaluyn qadaǵalap, qauípsízdíktí qamtamasyz etíp, órttíń aldyn alady.
«Orman sharuashylyǵy qyzmetkerlerí úshín jaz – demalys uaqyty emes, jauapty kezeń. Kún jylyǵannan bastap búkíl jaz boıy jalǵasatyn órt qaupí joǵary mausym bastalady. Osy uaqytta bízdíń basty míndetímíz – órttíń shyǵuyna jol bermeu, ūlttyq parkke kelushílerdíń qauípsízdígín qamtamasyz etu», – deıdí Raıhan Mūhamedjanova.
Mausym bastalar aldynda parkte barlyq órt sóndíru tehnıkasy, qūral-jabdyq pen qajettí múlík tekserílgen. Almaty men oblystyń tótenshe jaǵdaı departamentí bólímshelerímen bírlesíp jūmys ísteu tártíbí bekítíldí.
Orman órtímen kúresu úshín II tıptegí jańa orman órt stantsıyasy salynyp, 32 adamnan tūratyn arnauly jasaq qūryldy. Sonymen qatar 1 500 lıtr benzın men 1 200 lıtr dızel otynynan tūratyn janar-jaǵarmaı qory qūryldy.
Park aumaǵyndaǵy joldar da jóndeuden ótíp jatyr. Josparlanǵan 90 shaqyrym joldyń 45 shaqyrymy qalpyna keltíríldí. Jalpy ūzyndyǵy 294 shaqyrym bolatyn órtke qarsy jolaqtaǵy qūrǵaq shóp ekí ret shabyldy.
Sonymen qatar park qyzmetkerlerí órt qauípsízdígí erejelerí boıynsha 2 757 dárís, semınar men túsíndírme kezdesuín ótkízdí. Tūrǵyndar men turısterge 8 myń jadynama taratyldy. Bıyl barlyǵy osyndaı 30 myń aqparattyq materıal taratu josparlanyp otyr.
«Bíz aldyn aluǵa kóp kóńíl bólemíz, óıtkení órttí keıín sóndírgennen górí onyń aldyn alǵan áldeqaıda tıímdí. Sondyqtan órtke qarsy joldardy jóndep, jolaqty qūrǵaq shópten tazartyp, ormandaǵy qauípsízdík erejesín únemí kelgen-ketken adamnyń únemí qūlaǵyna qūıyp otyramyz. Ár adam barynsha jauapty boluy kerek», – dep atap óttí spıker.
Parktíń bıík tauly bólígínde 22 baqylau mūnarasy men 20 tíkūshaq alańy qalpyna keltíríldí. Tauly betkeıde segíz eskertu belgísí jańartyldy.
Almaty men oblystyń tótenshe jaǵdaılar departamentí bólímshelerímen bírlesíp Aqsaı, Talǵar men Túrgen bólímshesínde órtke qarsy oqu-jattyǵu auqymdy ótkízíldí. Qūtqarushylar men ūlttyq park qyzmetkerlerí shartty orman órtín oqshaulap, ony sóndíru jūmysyn bír pysyqtap aldy.
Órttí erte anyqtau júıesíníń engízíluí negízgí jańalyqtyń bírí boldy. 15 núktede antenna-díńgek qūrylymdary men kamera ornatyldy. Olar memlekettík orman qory aumaǵyn táulík boıy baqylauǵa múmkíndík beredí.
Ortalyq jedel basqaru punktínde jóndeu jūmystary ayaqtalyp, alty monıtor men ekí negízgí kompyuter ornatyldy. Qyzmetkerler jańa júıemen jūmys ísteu úshín oqytudan óttí. Qazír jabdyqty synaqtan ótkízíp jatyr.
«On bes kamera park aumaǵyndaǵy jaǵdaıdy táulík boıy baqylap, tútín nemese órttí jyldam anyqtauǵa múmkíndík beredí. Būl qyzmetkerlerdí oqıǵa ornyna jedel jíberíp, órttíń taraluyna jol bermeıdí. Qazírgí uaqytta júıe sońǵy synaq kezeńínen óte bastady», – dedí Raıhan Mūhamedjanova.
Órt qaupí joǵary mausym bastalǵannan berí ūlttyq park qyzmetkerlerí tótenshe jaǵdaı departamentí ókílderímen bírlesíp 528 reıd júrgízdí. Órt qauípsízdígí talaptaryn būzǵany úshín segíz adam ákímshílík jauapkershílíkke tartyldy. Aıyppūldyń jalpy somasy 2 mln 158,5 myń teńgení qūrady. Onyń íshínde 1 mln teńgeden astamy óndírílíp alyndy.
Ūlttyq parkke kelushílerge belgílenbegen oryndarda ot jaǵuǵa, temekí tūqylyn tastap, órt qaupín tudyratyn qoqys qaldyruǵa tyıym salynatyny eskertíledí. Qarapaıym qauípsízdík erejesín saqtau órttíń aldyn alyp, orman ekojúıesín saqtauǵa sep bolady.