Qazaqstan Respublıkasy Ūlttyq Bankíníń Aqsha-kredıt sayasaty komıtetí bazalyq mólsherlemení +/- 1 paıyzdyq punkt dálízímen jyldyq 18,0% deńgeıínde saqtau turaly sheshím qabyldady.
Būl sheshím makroekonomıkalyq kórsetkíshterdíń jańartylǵan baǵalauy, ınflyatsıya táuekelderí men boljam raundy nátıjeleríne negízdelgen, – dep habarlaıdy aqshamnews.kz tílshísí..
2026 jylǵy aqpandaǵy jyldyq ınflyatsıya 11,7%-ǵa deıín tómendep, qańtardaǵy 12,2%-dan azaıdy. Azyq-túlík tauarlary boıynsha baǵanyń ósuí 12,7%, azyq-túlíkke jatpaıtyn tauarlarda – 11,6%, al aqyly qyzmetter boıynsha – 10,8% boldy. Dezınflyatsıyaǵa qatań aqsha-kredıt sharttary, teńgeníń nyǵayuy, tūtynushylyq kredıtteudíń báseńdeuí, ETRT men artyq ótímdílíktí qysqartu sharalary, sondaı-aq Úkímet pen Ūlttyq Banktíń ınflyatsıyaǵa qarsy keshendí ís-qımyldary áser etude.
Aılyq ınflyatsıya aqpanda 1,1%-dy qūrady, bazalyq ınflyatsıya 0,8%-ǵa jettí. Halyqtyń ınflyatsıyalyq kútulerí tómendegenímen, álí de qūbylmaly bolyp otyr, al naryq qatysushylarynyń boljamy 2026 jylǵa 10,0%-ǵa deıín tómendedí.
Álemdík naryqta azyq-túlík baǵasy bayaulap keledí: sút ónímderí men qant baǵasy tómendep, dándí daqyldar men ósímdík maıynyń baǵasy joǵarylady. Mūnaı baǵasy bírínshí jartyjyldyqta joǵary deńgeıde saqtalady dep boljansa, 2026 jyly orta eseppen 66,3 AQSh dollary/barrel bolady dep kútílude.
Ūlttyq Bank pen Úkímettíń bírlesken ís-qımyldary arqyly 2026 jyly ınflyatsıya 9,5-11,5% shegínde bolady dep boljanuda. 2027 jyly ınflyatsıya 5,5-7,5%-ǵa deıín, al 2028 jyly 5%-dyq targetke jaqyn deńgeıge deıín tómendeuí kútílude.
JÍÓ ósu boljamy 3,5-4,5% aralyǵynda saqtalyp otyr. Íshkí sūranys bayaulaıdy, ekonomıkalyq belsendílík bírtíndep tūraqtanady. Aqsha-kredıt sayasatyn jeńíldetu úshín álí keńístík qalyptaspaǵan, bíraq 2026 jyldyń ekínshí jartyjyldyǵynda bazalyq mólsherlemení tómendetu múmkíndígí qaralatyn bolady.
Aqsha-kredıt sayasaty komıtetíníń bazalyq mólsherleme turaly tolyq bayandamasy 2026 jylǵy 11 nauryzda Ūlttyq Banktíń resmı saıtynda jarıyalanady. Kelesí josparly sheshím 24 sáuírde saǵat 12:00-de Astana uaqyty boıynsha jarıyalanbaq.
