«Qazgıdromet» boljamynsha elímízdíń 14 oblysynda jáne Astanada aua raıyna baılanysty qauíp kúsheımek. Sondyqtan elde dauyldy eskertu jarıyalandy, dep habarlaıdy Aqshamnews.kz tílshísí.
Sársenbí kúní el aumaǵynda qys mínez kórsetpek. Bír óńírde aqtútek boran soqsa, endí bír aımaqty qalyń tūman basady. Qar men kóktaıǵaq jol qozǵalysyn qıyndatyp, jeldíń ekpíní keı jerde sekundyna 28 metrge deıín jetuí múmkín.
Soltústík pen shyǵys óńírlerde qar aralas boran kúsheıedí. Pavlodar, Soltústík Qazaqstan, Aqmola, Qaraǵandy oblystarynda būrqasyn soǵyp, túngí uaqytta jel ekpíní aıtarlyqtaı artady. Keı aımaqta qardyń saldarynan kórínu qashyqtyǵy tómendeıdí. Būl aımaqtarda aua temperaturasy –10–18 gradus shamasynda bolady.
Shyǵys Qazaqstan men Abaı oblystarynda da aua raıy kúrdelí. Mūnda qar jauyp, būrqasynmen qatar kóktaıǵaq qalyptasady. Túnde soqqan qatty jel tūrǵyndarǵa qosymsha qauíp tóndíruí múmkín. Óńírde synap baǵanasy – 15–25 gradusqa deıín tómendeıdí.
Batys óńírlerde jaǵdaı bírshama basqasha. Atyrau, Batys Qazaqstan, Mańǵystau oblystarynda tūman túsíp, joldar taıǵaq bolady. Keı jerde jel kúsheıíp, kólík qozǵalysyna kedergí keltíruí yqtımal. Kúndízgí aua temperaturasy –3 –8 gradus, túnde –10 gradusqa deıín salqyndauy yqtımal.
Ońtústíkte, ásírese Túrkístan oblysynyń tauly audandarynda tūman kútíledí. Tau asularynda jeldíń ekpíní artyp, jolǵa shyqqandar úshín saqtyq qajet. Óńírde aua temperaturasy –2 men +5 gradus aralyǵynda saqtalady.
Elordada da qysqy qolaısyzdyq sezíledí. Astanada azdap qar jauyp, jer bauyrlaǵan boran soǵyp, joldar kóktaıǵaqqa aınaluy múmkín. Aua temperaturasy túnde –15–18 gradusqa deıín tómendeıdí.
Mamandar tūrǵyndardy alys jolǵa shyqqanda mūqıyat boluǵa, aua raıy turaly eskertulerdí eskeríp, qauípsízdík sharalaryn saqtauǵa shaqyrady.