Almatydaǵy Daraboz shaǵynaudanyndaǵy dúken ıesí syranyń aqysyn tólemeı ketken er adamǵa qatysty áleumettík jelíde jazba jarıyalady. Oqıǵadan keıín polıtsıya tekseru júrgíze bastady, dep habarlaıdy Aqshamnews.kz tílshísí.
Almaty qalasyndaǵy Daraboz shaǵynaudanynda ornalasqan dúkenníń ıesí áskerı formaǵa ūqsas kıím kıgen er adamǵa áleumettík jelí arqyly úndeu jasady. Onyń aıtuynsha, kelushí dúkennen bír qūty syra alyp, tauar aqysyn tólemesten shyǵyp ketken.
Oqıǵa sátí beınebaqylau kamerasyna túsíp qalǵan. Dúken ıesí vıdeony Threads áleumettík jelísínde jarıyalap, er adamnan satyp alǵan tauary úshín aqysyn tóleudí sūraǵan.
Vıdeo áleumettík jelílerde taralǵannan keıín būl jaıtqa qūqyq qorǵau organdary nazar audardy.
Almaty qalalyq Polıtsıya departamentíníń málímetínshe, atalǵan derek boıynsha tekseru bastalǵan.
«Alatau audandyq polıtsıya basqarmasyna qarasty bólímde tekseru jūmystary qolǵa alyndy. Qūqyq būzushyǵa qatysty Qazaqstan Respublıkasynyń zańnamasyna sáıkes sharalar qabyldanady», – dep habarlady polıtsıya ókílderí.
Oqıǵaǵa er adamnyń áskerı formaǵa ūqsas kıímmen júrgení sebeptí Qorǵanys mınıstrlígí de túsíníkteme berdí. Vedomstvo málímetínshe, vıdeodaǵy azamattyń Qazaqstan Qaruly kúshteríne esh qatysy joq.
Mınıstrlík ókílderíníń habarlauynsha, ol – joǵary oqu oryndarynyń bírínde bílím alyp júrgen student jáne áskerı kafedrada oqıdy.
Sondaı-aq vedomstvo vıdeodaǵy kıím úlgísí qazírgí Qaruly kúshter formasyna sáıkes kelmeıtínín atap óttí. Atap aıtqanda, kıímde tıístí aıyrym belgílerí joq, al ústíndegí dalalyq kıím úlgísí eskírgen nūsqa jáne qazírgí uaqytta Qaruly kúshterde qoldanylmaıdy.
Qazírgí uaqytta polıtsıya barlyq mán-jaıdy anyqtauǵa baǵyttalǵan tekseru sharalaryn júrgízíp jatyr. Ís boıynsha keıín protsessualdyq sheshím qabyldanady.