Memleket basshysy Qasym-Jomart Toqaev "Turkistan" gazetíne bergen sūhbatynda salyq reformasyna qatysty píkír bíldíríp, qoǵamda dúrbeleń tuǵyzuǵa negíz joq ekenín aıtty, - dep habarlaıdy Aqshamnews.kz tílshísí.
Prezıdenttíń sózínshe, mūndaı ózgeríster kóptegen elde júríp jatyr, mysal retínde Reseıde qosymsha qūn salyǵynyń 22 paıyzǵa deıín kóterílgenín keltírdí.
"Árıne, salyq reformasy – ózektí másele jáne būǵan qatysty píkírtalastardyń boluy ábden túsíníktí. Degenmen, el íshínde dúrbeleń tuǵyzyp, jūrtty dúrlíktírudíń eshqandaı jóní joq. Mūndaı reforma kóptegen elde júrgízílíp jatyr. Mysaly, Reseıde qosymsha qūn salyǵy juyrda 22 paıyzǵa deıín kóteríldí", - dedí memleket basshysy.
Sonymen qatar Memleket basshysy qosymsha qūn salyǵyna qatysty talqylauda būrynǵy Úkímettíń de, qazírgí Úkímettíń de mólsherlemení 20 paıyzǵa deıín kóterudí ūsynǵanyn eske saldy. Alaıda Prezıdent Úkímetke onyń joǵarǵy shegín 4 satyǵa tómendetu turaly tapsyrma bergen.
"Jańa Salyq kodeksínde baqylau jasauǵa emes, ózara seríktestík ornatuǵa basa mán beríledí, yaǵnı, osy úderíske qatysushylardyń bárí – memleket te, bıznes te, azamattar da óz míndetín adal oryndauǵa tıís. Bírín-bírí ózara tolyqtyryp tūratyn mūndaı júıede salyq tóleu auyrtpalyq retínde qabyldanbaıtyn bolady. Túptep kelgende, salyq tóleu degenímíz – zamanauı qoǵamdyq kelísímshart degen sóz. Salyq tóleseńíz – qyzmet kórsetíledí, ınfraqūrylym salynady, qauípsíz orta qalyptasady, tyń múmkíndíkter paıda bolady. Kerek deseńíz, būl – ádíldík bolu úshín júktemení qaıta bólu qūraly, áleumettík tūrǵydan álsízderdí qoldau jáne ekonomıkalyq tūrǵydan «belsendí ortany» odan árí damytu tásílí", - dedí ol.
Sondaı-aq Memleket basshysy fıskaldyq sayasattyń tıímdílígí ony júrgízudíń sapasyna, qoǵamnyń salyq sauatyna jáne sana-sezímíne baılanysty ekenín aıtyp, salyq tóleu mádenıetí qalyptasuy kerektígín atap óttí. Prezıdent salyq tóleudí otanshyldyqtyń ozyq úlgísíne teńep, būl sybaılas jemqorlyqqa qarsy qoǵam qūruǵa yqpal etetínín aıtty.