Qazaq kınosy – eldíń tarıhyn, mádenıetín, ūlttyq bolmysyn jáne qoǵamdaǵy ózgerísterdí beıneleıtín mańyzdy óner salalarynyń bírí. Kıno arqyly ár kezeńníń tynys-tírshílígín, halyqtyń dúnıetanymy men qūndylyqtaryn keńínen tanytuǵa múmkíndík bar.
Osy oraıda Almatyda otandyq kınematografıyanyń tarıhy men jetístíkterín zamanauı formatta nasıhattaıtyn jańa qoǵamdyq keńístík qūru josparlanyp otyr. Naqtyraq aıtqanda, otandyq kınematografıya tarıhyna arnalǵan jańa qoǵamdyq keńístíktíń tūjyrymdamasy ázírlenude.
Qalanyń qoǵamdyq keńístíkterín damytu basqarmasynyń málímetínshe, «Qazaqfılm» kınematografıyalyq parkí tūrǵyndar men qala qonaqtarynyń seruendep, tynyǵuyna, sondaı-aq elímízdíń kıno ónerímen jaqynyraq tanysuyna múmkíndík beretín zamanauı mádenı orynǵa aınalmaq.
Joba ayasynda bírneshe taqyryptyq aımaq qūru kózdelgen. Olardyń árqaısysy qazaq kınosynyń qalyptasuy men damuyndaǵy belgílí bír kezeńge arnalmaq. Osylaısha, parkke kelushíler otandyq kınematografıyanyń tarıhyn kezeń-kezeńímen tanyp, onyń qalyptasuyna úles qosqan tuyndylar men mádenı qūndylyqtar turaly maǵlūmat ala alady.
Jańa keńístíkte seruendeuge arnalǵan arnaıy alleyalar salu josparlanǵan. Sonymen qatar kelushílerdíń nazaryn audaryp, kıno tarıhyn zamanauı tásílder arqyly tanystyru úshín ınteraktıvtí jáne multımedıyalyq ınstallyatsıyalar ornalastyrylady.
Jobanyń mańyzdy bólíkteríníń bírí – ashyq aspan astyndaǵy kıno kórsetílímderíne arnalǵan amfıteatr. Mūnda kórermender otandyq fılmderdí tabıǵı ortada tamashalap, kıno kóru mádenıetín qoǵamdyq keńístíkpen ūshtastyra alady. Būdan bólek, aumaqta balalarǵa arnalǵan oıyn alańdary men tūrǵyndardyń demaluyna arnalǵan arnaıy oryndar qarastyrylǵan.
Jobany ázírleushílerdíń aıtuynsha, qazaq kınosynyń tarıhy tek kórnekí nysandar arqyly ǵana emes, zamanauı ınteraktıvtí formattar negízínde de ūsynylady. Būl tásíl kelushílerge otandyq kınematografıyanyń damu barysyn, onyń aıtuly tuyndylary men Qazaqstannyń mádenı mūrasyn jeńíl árí túsíníktí túrde tanyp-bíluge múmkíndík beredí.
«Qazaqstan kınosynyń tarıhyn tek vızualdy elementter arqyly ǵana emes, zamanauı ınteraktıvtí formattarda da ūsynu josparlanyp otyr. Būl kelushílerge kınematografıyanyń damu jolymen, mańyzdy tuyndylarymen jáne eldíń mádenı mūrasymen qoljetímdí árí zamanauı formatta tanysuǵa múmkíndík beredí», – delíngen habarlamada.
Jańa sayabaqtyń erekshelígí – mádenı-aǵartushylyq mazmūnnyń demalys jáne seruendeu ınfraqūrylymymen úılesuí. Yaǵnı būl keńístík tek kıno tarıhyn tanystyratyn oryn ǵana emes, qala tūrǵyndary bos uaqytyn ótkíze alatyn ashyq qoǵamdyq orta retínde de qalyptaspaq.
Ásírese jastar men balalar úshín mūndaı keńístíktíń tanymdyq mání joǵary. Interaktıvtí tehnologıyalar arqyly kıno tarıhyn tanystyru dástúrlí aqparat beru tásílderíne qaraǵanda kórermenníń qyzyǵushylyǵyn arttyryp, mádenı mūraǵa degen nazaryn kúsheıtuge yqpal etedí.
Almatyda qolǵa alynǵan būl joba otandyq kınematografıyanyń tarıhyn jańa formatta tanystyruǵa baǵyttalǵan. Qazaq kınosynyń kórnektí tuyndylary men damu kezeńderín zamanauı tehnologıyalarmen ūshtastyra otyryp kórsetu arqyly sayabaq mádenı-aǵartushylyq jáne qoǵamdyq demalys keńístígíníń qyzmetín qatar atqarmaq.
«Qazaqfılm» kınematografıyalyq parkí júzege asqan jaǵdaıda Almaty tūrǵyndary men qala qonaqtary qazaq kınosynyń tarıhymen tanysyp qana qoımaı, ashyq aspan astyndaǵy kıno kórsetílímderíne qatysyp, seruendep, demala alatyn jańa mádenı ortaǵa qol jetkízedí. Būl bastama otandyq kıno mūrasyn keıíngí ūrpaqqa tanystyrudyń jáne ony zamanauı qoǵamdyq keńístík arqyly dárípteudíń bír tetígí bolmaq.
Roza RAQYMQYZY