Memleket basshysynyń aıtuynsha, zıyatkerlík kapıtaldy kúsheıtíp, eńbek ónímdílígín arttyrmasa, tek demografıyalyq ósím básekege qabílettí el boluǵa kepíldík bermeıdí, – dep habarlaıdy aqshamnews.kz tílshísí.
– Esepsíz nemese kózge kórínbeıtín dúnıení basqaru qıyn. Sondyqtan Úkímet kóp sozbaı, vedomstvolar deńgeıíndegí jaǵdaıǵa bazalyq esep júrgízetín júıení qoldanysqa engízgení jón. Būǵan salǵyrt qarauǵa bolmaıdy, jūmysty keshíktírmeu kerek. Tsıfrlandyru men memlekettík jobalardyń paıdasyn jan-jaqty zerdeleu qajet. Úkímet Digital Qazaqstan strategıyasy ayasynda «ízashar jobalardy» íríktep shyǵardy. Olardy mūqıyat saraptap, ekonomıkaǵa tíkeleı áserín anyqtau kerek. Jalpy, qaı salada bolsyn, túpkí nátıjege jetu úshín árkím jeke jauapkershílíkten qashpauy qajet. Bízde basqa tańdau joq: ne tıímdí tsıfrlyq ekonomıka qūramyz, ne órkenıet kóshíníń sońynda qalamyz. Basqasha aıtqanda, «ne bolamyz, ne bordaı tozamyz», – dedí Prezıdent.
Memleket basshysynyń aıtuynsha, zıyatkerlík kapıtaldy kúsheıtíp, eńbek ónímdílígín arttyrmasa, tek demografıyalyq ósím básekege qabílettí el boluǵa kepíldík bermeıdí.
– Keńestíń osyǵan deıíngí otyrysynda qabyldanǵan sheshímge saı bıyl Ortalyq Azıyadaǵy alǵashqy Jasandy ıntellekt unıversıtetí ashylady. Sheteldík joǵary oqu oryndarymen seríktestík qūru arqyly írgelí jáne qoldanbaly ǵylymdy damytudy qolǵa aldyq. Bírneshe jobanyń tízímí jasaldy. Olar barynsha jedel taratyluǵa tıís. Úkímet qysqa merzím íshínde «ǵylymnan naryqqa deıíngí» kezeńderdí túgel qamtıtyn tízbek jasauy kerek. Aldymyzda qoldanbaly ázírlemelerdí tez arada kommertsıyalandyru, salyqtyq yntalandyru jáne keleshegínen kóp úmít kúttíretín jobalardy bírlese qarjylandyru qūraldary qarastyrylǵan tolyqqandy venchurlyq ekojúıe qalyptastyru míndetí tūr. Mūndaı pármendí tetík bolmasa, ǵylymı áleuetímíz tek akademıyalyq ortamen shektelíp qalady, – dedí Memleket basshysy.