QR Mádenıet jáne aqparat mınıstrlígíníń qoldauymen ūıymdastyrylǵan būl bíregeı mádenı joba bıyl besínshí márte shymyldyǵyn túrdí, – dep habarlaıdy aqshamnews.kz tílshísí.
Jambyl atyndaǵy Qazaq memlekettík akademıyalyq fılarmonıyasynyń Úlken zalynda elímízdíń hor óneríndegí eń auqymdy sharalardyń bírí – dástúrlí «Gúl Almaty – 2026» V festıvalí joǵary deńgeıde óttí.
Bıylǵy festıvaldíń basty erekshelígí – onyń auqymynda. Sahna tórínde balalar men kásíbı ūjymdardan qūralǵan 9 hor ūjymy, yaǵnı 500-ge juyq ónerpaz toǵysty. Būl qalalyq auqymdaǵy festıval ūlttyq hor mektebíníń sabaqtastyǵyn kórsetíp, jas talanttar men kásíbı sheberler arasyndaǵy altyn kópírge aınaldy.
Festıvalge qatysqan ūjymdar: Beıímbet Demeuov bastaǵan B. Baıqadamov atyndaǵy Memlekettík hor kapellasymen bírge sahnada «Kókek» jáne «Kóktem» balalar horlary, A. Jūbanov atyndaǵy mektep-ınternattyń ūldar men qyzdar hory, Qazaq ūlttyq qyzdar pedagogıkalyq unıversıtetíníń ūjymy, «ALAKOZ» kameralyq hory, «Knyajıchı» erler hory, Qūrmanǵazy atyndaǵy QŪK hory jáne Astanadan arnaıy kelgen E. Rahmadıev atyndaǵy fılarmonıyanyń kameralyq hory óner kórsettí.
Baǵdarlama mazmūny: Merekelík keshte qazaq kompozıtorlarynyń klassıkalyq tuyndylary, aru qala Almatyǵa arnalǵan lırıkalyq ánder jáne álemdík muzykanyń erkín janrdaǵy jauharlary shyrqaldy. Kórermender hor muzykasynyń san aluan boyauyn sezíníp, joǵary ruhanı áser aldy.
Ūıymdastyrushylardyń aıtuynsha, būl joba tek kontsert qana emes, sonymen qatar elímízdegí hor mektepteríníń ózara tájírıbe almasuyna, repertuardyń baıyuyna jáne balalar shyǵarmashylyǵynyń jańa beleske kóteríluíne yqpal etetín mańyzdy kásíbı alań.