Búgin Astanada aýyl ákimderiniń dıalog-platformasy ótip jatyr. Jıynda Memleket basshysy Qasym-Jomart Toqaev sóz sóılep, aýyldy órkendetý, aýyl ákimderi ınstıtýtyn odan ári jetildirý mindetterin aıtty, - dep habarlaıdy aqshamnews.kz tilshisi.
"Búgingi jıynnyń mán-mańyzy aıryqsha. Elimizdegi barlyq deńgeıdegi atqarýshy bılik ókilderi osy jerge arnaıy shaqyryldy. Aýyl ákimderiniń basym kópshiligi, ıaǵnı 80 paıyzy osynda. Jalpy, osyndaı aýqymdy qurammen alǵash ret bas qosyp otyrmyz.
Shyn máninde, taqyryp - óte ózekti. Aýyldyń jaǵdaıy - elimiz úshin strategıalyq mańyzy bar másele. Sebebi halqymyzdyń tamyry - aýylda. Aýyldarymyz myqty bolsa, elimiz de berekeli bolmaq. Sondyqtan aýyl ákimderine qoıylatyn talap ta, olarǵa júkteletin mindet te árdaıym erekshe.
Ákim - eń aldymen, halyqpen tikeleı jumys isteıtin memlekettik qyzmetshi. Bul - óte jaýapty jumys. Aýyl ákimi aýyldyń bolmysyn, aýyldaǵy aǵaıynnyń ómirin jete túsinetin naǵyz isker maman bolýy kerek.
Jańa ǵana birneshe ákimniń sózin tyńdadyq. Aıtylǵan oı-pikirlerdi jáne usynystardy muqıat zerdelep, jumys barysynda mindetti túrde eskerý qajet".