Túrkístan oblysynyń Arys audanynda agroónerkásíp salasynda asa írí kólemde byudjet qarajatyn jymqyru deregí anyqtaldy, dep habarlaıdy Aqshamnews.kz tílshísí.
Arys audanynda auyl sharuashylyǵyn damytuǵa bólíngen memlekettík subsıdıyalardy zańsyz alu faktísí prokurorlyq tekseru barysynda belgílí boldy. Būl turaly óńír prokuraturasy málím ettí.
Tergeu málímetínshe, 2021 jyldyń sáuír aıynda «Y» auyl sharuashylyǵy óndírístík kooperatıvíníń tóraıymy aqparattyq júıege jalǵan málímet engízudí ūıymdastyrǵan. Qūjattarda kooperatıvtíń jalǵa alǵany turaly jalǵan derekter kórsetílgen.
Atap aıtqanda, júıege:
2 470 bas analyq írí qara;
selektsıyalyq jūmys júrgízuge arnalǵan 120 asyl tūqymdy būqa jalǵa alynǵany turaly málímet engízílgen.
Osy aqparattyń negízínde kooperatıvtíń esepshotyna memleketten 24,7 mln teńge kólemínde subsıdıya audarylǵan.
Alaıda tekseru kezínde shyn mánínde selektsıyalyq jūmys tek 18 asyl tūqymdy būqa men 450 bas analyq malǵa ǵana júrgízílgení anyqtaldy.
Osylaısha, zańsyz alynǵan subsıdıya kólemí 20,2 mln teńgení qūraǵan.
Atalǵan faktí boıynsha prokuratura Qylmystyq kodekstíń 190-baby 4-bólígí 2-tarmaǵy boıynsha, yaǵnı asa írí kólemdegí alayaqtyq deregímen sotqa deıíngí tergep-tekserudí bastaǵan.
2026 jylǵy 20 aqpandaǵy sot úkímímen kooperatıv tóraıymy kínálí dep tanyldy. Sot oǵan 4 jyl bas bostandyǵynan aıyru jazasyn taǵaıyndady. Sonymen qatar 5 jyl merzímge kommertsıyalyq ūıymdarda basshylyq qyzmet atqaru qūqyǵynan aıyrdy.
Zańsyz alynǵan 20,2 mln teńge byudjet qarajaty tolyq kólemde óndírílíp, memleket kírísíne qaıtaryldy.
Aıta keteıík, sot úkímí ázírge zańdy kúshíne engen joq.