Sońǵy ekí jylda Qazaqstanda onkologıyalyq patsıentterdíń sáulelík terapıyamen qamtylu deńgeıí 60 paıyzǵa juyqtady, dep habarlaıdy aqshamnews.kz tílshísí.
Áleumettík jelíler men būqaralyq aqparat qūraldarynda tomoterapıyanyń qoljetímdílígíne qatysty másele mezgíl-mezgíl kóterílíp keledí. Patsıentter men olardyń jaqyndarynyń alańdaushylyǵyn túsínemíz, sondyqtan būl máselege naqty túsíníkteme berudí mańyzdy dep sanaımyz.
Eń aldymen, tomoterapıya – emdeudíń jeke túrí emes, qazírgí zamanǵy qashyqtyqtan júrgízíletín sáulelík terapıyanyń ádísteríníń bírí. Sońǵy jyldary sáulelík terapıya tehnologıyalary aıtarlyqtaı jetíldíríldí. Búgínde būryn tomoterapıyalyq qondyrǵylardyń kómegímen oryndalǵan míndetterdíń basym bólígí sońǵy buyndaǵy zamanauı syzyqtyq údetkíshter arqyly joǵary deńgeıde júzege asyrylady.
Emdeu ádísín tańdau apparattyń atauyna emes, halyqaralyq klınıkalyq ūsynymdarǵa, ísíktíń ornalasuyna, aurudyń satysyna jáne patsıenttíń jeke erekshelíkteríne negízdeledí. Tıístí sheshímdí multıdıstsıplınarlyq dárígerler toby qabyldaıdy.
«Tomoterapıya eshqaıda joǵalǵan joq. Tehnologıyalar men jabdyqtardyń múmkíndíkterí ózgerdí. Zamanauı syzyqtyq údetkíshter joǵary dáldíktegí sáulelík terapıyanyń ís júzínde barlyq spektrín júrgízuge múmkíndík beredí, al bírqatar klınıkalyq jaǵdaılarda olardyń múmkíndíkterí būdan da keń. Patsıent úshín eń bastysy – apparattyń atauy emes, dūrys tańdalǵan emdeu taktıkasy, sapaly josparlau jáne mamandar komandasynyń kásíbılígí», – dedí QazOjRǴZI Radıatsıyalyq onkologıya ortalyǵynyń jetekshísí, medıtsına ǵylymdarynyń doktory Vıktor Kım.
Búgínde Qazaqstanda medıtsınalyq kórsetílímder boıynsha sáulelík terapıya qajet barlyq patsıentter, onyń íshínde balalar da, tegín medıtsınalyq kómektíń kepíldík berílgen kólemí ayasynda joǵary tehnologıyalyq medıtsınalyq kómektí tegín alady.
Qazírgí uaqytta elímízdíń barlyq óńírlerínde derlík zamanauı syzyqtyq údetkíshter ornatylǵan. Qaraǵandy jáne Semeı qalalarynda ekíden joǵary tehnologıyalyq apparat jūmys ísteıdí. Astana qalasyndaǵy Ūlttyq ǵylymı onkologıya ortalyǵynda tórt syzyqtyq údetkísh, al qalalyq onkologıyalyq ortalyqta taǵy ekí apparat patsıentterge qyzmet kórsetude.
Sońǵy ekí jylda Qazaqstanda onkologıyalyq patsıentterdíń sáulelík terapıyamen qamtylu deńgeıí 60 paıyzǵa juyqtady. Būl kórsetkísh damyǵan Europa elderíníń deńgeıíne barynsha jaqyn.
Onkologıyalyq qyzmettí damytu, materıaldyq-tehnıkalyq bazany jańǵyrtu jáne zamanauı medıtsınalyq tehnologıyalardy engízu jūmystary júıelí túrde jalǵasuda. Negízgí maqsat – árbír patsıenttíń uaqtyly, sapaly, tıímdí árí qauípsíz em aluyna jaǵdaı jasau.
Avtorlar:
Qalymova G.D. – QazOjRǴZI baspasóz hatshysy.
Vıktor Kım – QazOjRǴZI Radıatsıyalyq onkologıya ortalyǵynyń jetekshísí, medıtsına ǵylymdarynyń doktory.