Byltyr Astanada 3 jasar qyzdarynyń tisin emdetýge aparyp, ata-anasy odan qapelimde "aıyrylyp" qalǵan. Qaıǵydan qan jutyp otyrǵan otbasy osy kúni qyzynyń ólimine kináli klınıkamen sottasyp jatyr.
Balaǵa bastapqyda anestezıa jasalyp, birden 18 tisine em jasalǵan. Alaıda "Sevoran" anestezıasynan kishkentaı Zere sol kúıi oıanbaǵan.
Oqıǵanyń mán-jaıy
Sot barysynda saraptama derekteri jarıalandy. Sarapshylardyń qorytyndysy boıynsha, mı isigi "Sevoran" anestezıasy durys júrgizilmegennen paıda bolýy múmkin. Sonymen qatar, jergilikti aýyrsynýdy basatyn lıdokaınniń dozasy balaǵa tym kóp egilgen.
Jartylaı qalpyna kelmegen ókpe fýnksıasy men qabyný fonynda "Sevorandy" tórt jarym saǵat boıy qoldaný ótkir gıpoksıaǵa (otteginiń jetispeýshiligine), júrektiń toqtaýyna jáne mı isigine ákelýi múmkin, sol sebepten ólim oryn aldy. Bir eskere ketetin jaıt, kishkentaı qyz tisin emderdiń aldynda pnevmonıamen aýyrǵan, biraq klınıka bul derekti eskermegen kórinedi.
"Sedasıadan buryn biz 7 aı buryn aýrýhanada jattyq. Eger ol tek 2-3 apta buryn bolsa, biz mundaı anestezıa men emdeýge barmas edik. Olar bizdi bolýy múmkin qaýip-qaterler týraly habardar etýi tıis edi", - dedi qyzdyń ákesi Talǵat Qumarov.
Prokýrordyń aıtýynsha, anestezıolog pen stomatolog pedıatrmen keńesip, qan taldaýyn (AITV, gepatıt jáne basqa ınfeksıalar) jasaýǵa mindetti bolǵan. Alaıda klınıka bul talaptardy oryndamaǵan.
Maman ne deıdi?
Aqshamnews.kz tilshisi osy jaǵdaıǵa qatysty "Sevoran" anestezıasynyń erekshelikteri jaıly mamannan pikir aldy.
Qazirgi zamanaýı ıngalásıalyq bul preparat adamdy tez uıyqtatyp, jyldam operasıa jasaýǵa múmkindik beredi jáne densaýlyǵyna zıan keltirmeıdi. Onyń joǵary qaýipsizdigi balalarǵa tis emdeý sıaqty jaýapty salalarda qoldanýǵa múmkindik beredi. Balalarǵa bul aýyr prosedýrany túsindirý qıyn bolǵandyqtan, kóbine narkoz – tisterdi tez emdeýdiń tıimdi tásili bolyp otyr.
Stomatologıada kóptegen jaǵdaıda balalardan bastap eresek pasıentterge deıin keńes berýshi ári qadaǵalaýshy (kýrator) Salman Qanatuly "Sevoran" ádette qaýipsiz ekenin, biraq keıbir jaǵdaılarda saqtyq qajet ekenin atap ótti:
- pasıentte nemese týystarynda qaterli gıpertermıa;
- baýyrdyń aýyr aýrýlary;
- óte tómen qan qysymy nemese shok jaǵdaıynda;
- júrekke qatysty kúrdeli problemalar nemese arıtmıa;
- aǵzanyń qatty sýsyzdanýy (qurǵaýy) nemese kóp qan joǵaltý;
- bas mıynyń ishki qysymy joǵary bolsa;
- alergıalyq reaksıalar (óte sırek).
Aýyr reaksıalar kóbinese preparatqa emes, organızmniń erekshelikterine baılanysty. Sondyqtan narkozdan buryn júrek, tynys alý, zat almasý júıesi men tuqym qýalaıtyn táýekelderdi tekserý qajet. Tekserýlerden keıin ǵana anestezıolog eń qaýipsiz narkoz nusqasyn, mólsherin tańdaıdy.
Balalar ádette tynysh oıanady, biraq dárigerler nazar aýdarýy tıis keıbir sırek belgiler de bar eken. Olar: qatty álsireý, tynys alýdyń buzylýy, qan qysymynyń kenet tómendeýi nemese joǵarylaýy, júrek yrǵaǵynyń buzylýy, dem alýdyń qıyndaýy, dene qyzýynyń jyldam kóterilýi, sananyń shatasýy. Barlyq oıatý prosesi anestezıologtyń turaqty baqylaýymen ótedi.
Sonymen birge, mamannyń aıtýynsha, narkoz kezinde qaýipsizdik úshin klınıkada zamanaýı narkoz apparaty, monıtorlar (púls, qan qysymy, tynys alý, púlsoksımetr, EKG), ÓJJ apparaty, maskalar, ottegi júıesi, shuǵyl kómek quraldary, defıbrıllátor, bilikti anestezıolog pen anestezıst meıirbıke jáne baqylaý bólmesi bolýy kerek.
Salman Qanatuly Astanada bolǵan qaıǵyly jaǵdaıǵa baılanysty maman retinde aıtary: "Bul jerde qaıǵyly jaǵdaı dárigerlerdiń salǵyrttyǵynan, bolýy múmkin qaýipti jaǵdaılardy eskermegennen bolǵan sıaqty", - deıdi.
Jalpy, "Sevoran - balalar úshin eń tıimdi ádis. Ol tez áser etedi, barynsha alergıa týdyrmaıdy, ıneksıa qajet emes jáne tynysh ári yńǵaıly narkoz beredi. Tájirıbeli anestezıologtyń baqylaýymen bul prosedýra kishkentaı jáne qobaljǵysh pasıentter úshin de qaýipsiz ári jeńil ótedi", - dep túıindedi maman.
Salman Qanatuly jumys isteıtin jekemenshik stomatologıa klınıkasy da osyndaı ádispen emdeýge beıimdelgen. Balalardy da "Sevoran" anestetıgi arqyly oıdaǵydaı emdep júrgenin aıtady. Bastysy, qaýipsizdik talaptary men ár pasıenttiń densaýlyǵyndaǵy erekshelikterge saqtyqpen jáne jaýapkershilikpen qarap, eskerilýi tıis jaıttardy esten shyǵarmaý qajet deıdi.
Aıta keteıik, qalada "Sevoran" arqyly emdeý qyzmetiniń ortasha baǵasy 50 myń teńgeden bastalady.
Sonymen, "Sevoran" degen ne?
Sevoran - tynys alý arqyly beriletin zamanaýı anestezıa. Ol pasıentti uıyqtatyp, aýyrsynýdy múldem sezdirmeıdi.