Qazaqstandyq JASA TEAM komandasynyń múshelerí Omar Aserbekov pen Grıgorıı Shchukın Alpídegí eń kúrdelí klassıkalyq baǵyttardyń bírín baǵyndyrǵan alǵashqy qazaqstandyqtar atandy, – dep habarlaıdy aqshamnews.kz tílshísí.
Olar Bern Alpíleríndegí Eıger shyńyna (3 970 m) Hekmaıerdíń klassıkalyq baǵyty arqyly kóteríldí. Būl álemdík alpınızmdegí eń áıgílí árí tehnıkalyq jaǵynan kúrdelí baǵyttardyń bírí. 1935 jyldan berí mūnda 60-tan astam adam qaza tapqan.
Shyńǵa kóterílu ekí jarym kúnge sozyldy. Komanda mausymda alǵash bolyp jolǵa shyqqandyqtan, būrynǵy alpınısterdíń ízí bolmaǵan, olar jol salyp, jartastardy qardan tazartyp otyrdy. Bírínshí kúní qabyrǵanyń úshten ekí bólígín júríp ótíp, «Ólím bıvuagynda» shatyrsyz, saqtandyru núkteleríne baılanǵan kúıde túnep shyqty. Ekínshí kúní eń kúrdelí tehnıkalyq joǵarǵy bólíktí eńseríp, shyńǵa jettí bírden túsuge kírístí. Úshínshí kúní aman-esen tómen tústí.
Eıger Alpídegí «alty ūly soltústík qabyrǵanyń» qataryna kíredí. 2025 jyly Aserbekov pen Shchukın Ptı-Dryu jáne Grand-Joras taularynyń soltústík qabyrǵalaryn da baǵyndyrǵan bolatyn. Osylaısha olar bír mausymda baǵdarlamadaǵy eń kúrdelí úsh qabyrǵany eńseríp, árqaısysynda alǵashqy qazaqstandyqtar atandy.
Baǵyt tolyq avtonomdy stılde, yaǵnı gıdsíz, sherpasyz jáne aldyn ala daıyndyqsyz óttí. Segíz myńdyq shyńǵa ūıymdastyrylatyn kommertsıyalyq ekspedıtsıyalardan aıyrmashylyǵy, mūnda marshrut boıyna saqtandyru arqandary aldyn ala ílínbeıdí. Komanda tolyqtaı óz kúshíne súıendí. Būl alpınızmníń eń talapshyl baǵyttarynyń bírí sanalady.
Eıger atauy nemís tílínen audarǵanda «adam jegísh» degen maǵynany bíldíredí. Onyń soltústík qabyrǵasynda 1935 jyldan berí kemínde 64 alpınıst qaza tapqan. Osy sebeptí ol Mordwand — «qaterlí qabyrǵa» degen atauǵa ıe bolǵan. HH ǵasyrdaǵy baspasózde būl baǵyt «Ólím qabyrǵasy» degen atpen keńínen tanyldy. Hekmaıer baǵyty (6A sanaty) jartasty jáne mūzdy relefte joǵary deńgeıdegí órmeleu sheberlígín, shekteulí saqtandyru jaǵdaıynda qozǵalu tájírıbesín jáne úlken fızıkalyq tózímdílíktí talap etedí. Marshrut boıynda tík jartastar, mūz alańdary jáne qatqan mūz aralas kúrdelí uchaskeler kezektesíp keledí. Bıíktík aıyrmasy shamamen 1800 metr. Būl qabyrǵa tas qūlauy, qar kóshkíní jáne aua raıynyń kenet ózgeruímen de qauíptí.
JASA TEAM qūramyndaǵy Aserbekov pen Shchukınníń jetístígí qazaqstandyq alpınızmníń joǵary deńgeıín kórsetedí. Qazaqstandyq sportshylardyń jańa buyny būryn europalyq alpınıster basymdyq tanytyp kelgen tehnıkalyq elıtalyq alpınızm baǵyttaryn meńgere bastady.