Qūrmanǵazy atyndaǵy Qazaq ūlttyq halyq aspaptar orkestrí sahnasynda kúı men án ónerín dáríptegen erekshe kontsert óttí, – dep habarlaıdy aqshamnews.kz tílshísí.
Merekelík kesh qazaqtyń ūly aqyny Jambyl Jabaevtyń 180 jyldyǵy men áıgílí kúıshí Dına Nūrpeıísovanyń 165 jyldyǵyna arnaldy.
Kontserttík baǵdarlamada ūlttyq orkestrdíń súıemeldeuímen Jambyldyń jyrlary men ánderí, sondaı-aq Dına Nūrpeıísovanyń kúıshílík mūrasynan kúıler oryndaldy. Keshtíń basty keıípkerí – qazaq muzyka tarıhyndaǵy tūńǵysh kásíbı orkestr sanalatyn Qūrmanǵazy atyndaǵy Qazaq ūlttyq halyq aspaptar orkestrí boldy.
Sahna tórínde Qazaqstannyń halyq ártísí, dástúrlí ánshí Ramazan Stamǵazy, belgílí kúıshí Aıgúl Úlkenbaeva, «Eren eńbegí úshín» medalíníń ıegerí, orkestr ártísí Saǵdat Aqjolova, sondaı-aq halyqaralyq jáne respublıkalyq baıqaulardyń laureattary, orkestr ártísterí Móldír Qoıysova men Shattyq Uathan óner kórsettí. Olar ūlttyq orkestrmen bírge halyqqa áserlí muzykalyq baǵdarlama ūsyndy.
Ūjymnyń kórkemdík jetekshísí – Qazaqstannyń eńbek síńírgen qaıratkerí Batyrjan Myqtybaev. Al bas dırıjerí – «Qūrmet» ordeníníń ıegerí Abylaı Tílepbergen. Sonymen qatar Qazaqstannyń eńbek síńírgen qaıratkerí Jeksen Aısyn men Naryn Qajǵalı dırıjerlík sheberlíkterín pash ettí.
Orkestr dırektory Medet Quanyshevtíń aıtuynsha, ūjym bıylǵy kontserttík mausymdy áıgílí kompozıtor Ahmet Jūbanovtyń 120 jyldyǵyna arnalǵan kontsertpen bastaǵan.
– Bıylǵy alǵashqy kontsertímízdí Ahmet Jūbanovtyń mereıtoıyna arnadyq. Al búgíngí keshte Dına men Jambyldyń ónerín qatar dárípteudí jón kórdík. «Jambyldyń jyry, Dınanyń kúıí» atty būl kesh arqyly kórermenge erekshe baǵdarlama ūsynǵymyz keldí. Ár kontsertímízge úlken daıyndyqpen shyǵamyz. Aldaǵy uaqytta saundtrek kontsertterí, myuzıklder, sondaı-aq Jambyldyń 180 jyldyǵyna baılanysty teatrlarmen bírlesken úlken jobalar josparlanyp otyr, – dedí ol.
Al ánshí, «Alatau» dástúrlí óner teatrynyń ártísí Shattyq Uathan kontsertte Jambyldyń keńínen tanymal lırıkalyq tuyndysy «Úgáı-aı» ánín oryndaǵanyn aıtty.
– Búgíngí kontsertte óner kórsetu – men úshín zor quanysh. Jambyldyń lırıkalyq shyǵarmashylyǵynda halyqqa keńínen tanylǵan «Úgáı-aı» ánín oryndadym. Orkestrmen bírge arnaıy daıyndaldyq. Jalpy, Jambyl shyǵarmashylyǵyn zerttegende onyń lırıkalyq mūrasyna kóbírek kóńíl bólu kerek dep oılaımyn. Aqynnyń ǵashyqtyq kezeńínde Būrym esímdí sūluǵa arnap shyǵarǵan ání bar degen derekter de kezdesedí, – dedí ánshí.
Merekelík kesh ayasynda QR Ortalyq memlekettík kıno‑fotoqūjattar men dybys jazbalar arhıvímen bírlesíp ūıymdastyrylǵan kórme de kópshílík nazaryna ūsynyldy. Kórmede Jambyl Jabaev pen Dına Nūrpeıísovanyń ómírí men shyǵarmashylyǵyna qatysty sırek fotosuretter, tarıhı qūjattar men arhıvtík derekter qoıyldy. Būl ekspozıtsıya ūly tūlǵalardyń ruhanı mūrasyn tanytyp, olardyń ónerdegí orny men ómír jolyn keńínen nasıhattauǵa baǵyttaldy.
Dana SADYRQAN