2026 jyly 15 nauryz ben 30 sáuír aralyǵynda Almatyda kóktemgí jappaı deratızatsıya júrgízíledí, – dep habarlaıdy aqshamnews.kz tílshísí.
Būl jūmysty Almaty qalasynyń Kommunaldyq ınfraqūrylym jáne tūrǵyn úı ınspektsıyasy basqarmasy merdíger ūıym — «Eko Servıs Almaty» JShS-men bírlesíp ūıymdastyrady.
Ís-sharanyń negízgí maqsaty — jūqpaly aurulardyń taraluynyń aldyn alu jáne qala aumaǵyndaǵy sanıtarıyalyq qauíp-qaterlerdí azaıtu.
Kóktemgí kezeń ayasynda jalpy audany 47 gektardan asatyn ortaq paıdalanylatyn aumaqtar dárílenedí. Jūmystar kemírgíshterdíń negízgí mekendeıtín oryndarda júrgízíledí: ashyq bıotoptarda, jasyl aımaqtarda, kemírgíshterdíń índerínde, aryq jelílerínde, ózen men su aıdyndarynyń jaǵalaularynda, sondaı-aq qoǵamdyq kólík ayaldamalary mańynda.
Sonymen qatar jeke sektor tūrǵyndaryna qoldanu jóníndegí tolyq nūsqaulyǵymen bírge kemírgíshterge arnalǵan uly jem tegín taratylady.
Qalalyq qyzmetter «Halyq densaulyǵy jáne densaulyq saqtau júıesí turaly» Qazaqstan Respublıkasy Kodeksíníń 107-babyna sáıkes jeke jáne zańdy tūlǵalar ózderíne tıesílí aumaqtarda dezınfektsıya, dezınsektsıya jáne deratızatsıya jūmystaryn óz betínshe júrgízuge míndettí ekenín eske salady.
Osyǵan sáıkes, jeke tūrǵyn úılerdíń, ǵımarattardyń jáne jer aumaqtarynyń deratızatsıyasyn olardyń ıelerí júrgízedí. Al kondomınıum nysandarynyń ortaq múlkín — jertólelerdí, shatyrlardy, baspaldaq alańdaryn jáne úı mańyndaǵy aumaqtardy óńdeu MIB/PIK, sondaı-aq menshík ıelerí men jalǵa alushylardyń qarajaty esebínen júzege asyrylady.
Qalalyq qyzmetter zańdy tūlǵalardy, MIB/PIK-terdí ózderíne qarasty ǵımarattarda, aumaqtarda jáne qatty tūrmystyq qaldyqtarǵa arnalǵan konteıner alańdarynda deratızatsıya jūmystaryn qalalyq jappaı óńdeu nauqanyna qatar ūıymdastyruǵa shaqyrady. Mūndaı keshendí tásíl ís-sharalardyń tıímdílígín arttyryp, kemírgíshter sanyn azaıtuǵa múmkíndík beredí.