Shymkenttegi Adam quqyqtary jónindegi ýákildiń óńirlik ókili Nurjan Ábdezov sottalǵandardyń birin jeke qabyldap, qabyldaý barysynda ol azaptaý deregi boıynsha shaǵym túsirgenin aıtty, - dep habarlaıdy aqshamnews.kz tilshisi.
Tutqynnyń aıtýynsha, 2025 jylǵy maýsymda mekeme qyzmetkerleri ony soqqyǵa jyǵyp, qolyna kisen salyp, temir torǵa ilip, 4 saǵat boıy sol kúıi qaldyrǵan. Sondaı-aq, onyń aıaq kıimin sheship alyp, tabanynan urǵany aıtylǵan.
"Sonymen qatar, qabyldaý kezinde basqa bir sottalǵannyń da soqqyǵa jyǵylǵany anyqtaldy: onyń jaq súıegi synǵan", - delingen Qazaqstandaǵy Adam quqyqtary jónindegi ýákildiń saıtyndaǵy habarlamada.
Ótinish qorytyndysy boıynsha medısınalyq kómekti ýaqytyly kórsetpegeni úshin medısına qyzmetkerleri jazalanǵan. Sondaı-aq, mekeme qyzmetkerlerine qatysty QR Qylmystyq kodeksiniń 362-baby ("Bılikti nemese laýazymdyq ókilettikterdi asyra paıdalaný") boıynsha sotaldy tergep-tekserý tirkelgen.
"Joǵary qadaǵalaý organyna qyzmetkerlerdiń áreketterin qaıta qaraý týraly ótinish joldandy, óıtkeni onda azaptaý belgileri bar", - dep te kórsetilgen habarlamada.
Nátıjesinde Bas prokýratýra bul ustanymdy qoldap, sotaldy tergep-tekserý QR Qylmystyq kodeksiniń 146-baby 3-bóligi ("Qatygez, adamgershilikke jatpaıtyn nemese qadir-qasıetti qorlaıtyn qarym-qatynas, azaptaý") boıynsha qaıta saralanǵan. Mekemeniń úsh qyzmetkeri qamaýǵa alyndy.