Almaty oblysynda QazŪU arheologtary saq dáuíríníń altyn júzígín tapty, dep habarlaıdy aqshamnews.kz baspasóz qyzmetíne sílteme jasap.
Ál-Farabı atyndaǵy QazŪU-dyń tarıh fakultetíníń dekany, professor Dosbol Baıǵonaqovtyń jetekshílígímen Almaty oblysynyń Ūıǵyr audanynda qazba jūmystary júrgízílgen.
Ál-Farabı atyndaǵy QazŪU-dyń baspasóz qyzmetíníń habarlauynsha, Toǵyzbūlaq auylynyń mańynda erte temír dáuíríne jatatyn qorǵandar zertteldí. Mamandar auyldyń ońtústík bólígínde ornalasqan jáne 20-dan astam qorǵannan tūratyn Toǵyzbūlaq-1 jáne Toǵyzbūlaq-2 qorymdarynda dalalyq zertteuler júrgízdí. Arheologıyalyq nysandardyń negízgí bólígí tízbektele ornalasqan jáne soltústíkten ońtústíkke baǵyttalǵan elıtalyq qorǵandarǵa jatady. Toǵyzbūlaq-2 qorymy auyldyń soltústígínde ornalasqan jáne jalpy sany 30-dan asatyn túrlí qorǵandardan tūrady.
"Toǵyzbūlaq-1 qorymyndaǵy dalalyq zertteuler barysynda tórt qorǵan, al Toǵyzbūlaq-2 qorymynda ekí arheologıyalyq nysan qazyldy. Toǵyzbūlaq-1 qorymyndaǵy №3 jáne №4 qorǵandardyń úıíndísínen altyn áshekeılerdíń tabyluy aıtuly jańalyq boldy. №4 qorǵannan er men áıeldíń súıekterí tabyldy. Súıek qaldyqtarynyń janynan keramıkalyq ydystar, temír zattar, tas kelsap, januarlar súıekterí, altyn tízbektíń synyǵy, ártúrlí altyn plastınalar jáne t.b. tabyldy", dedí Tarıh ǵylymynyń doktory, professor Dosbol Baıǵonaqov.
№3 qorǵannyń úıíndísínen adamnyń súıek qaldyqtary, sondaı-aq altyn plastınalar tabyldy. Olardyń arasynda arystannyń suretí salynǵan altyn júzík erekshelenedí. Mūndaı artefaktíler sırek kezdesedí. Salmaǵy 8 gramǵa juyq júzík altyn qūımasynan jasalǵan. Júzíktegí arystannyń beınesí sınkretızmmen tyǵyz baılanysty. Bír qaraǵanda áıeldíń júzín, arystannyń tūmsyǵy men jalyn, típtí būqany, qoshqardy kóruge bolady, olardyń tańbasy ejelgí taıpalarda keń taraǵan. Mamandardyń aıtuynsha, mūndaı jerleu oryndary men artefaktíler Qazaqstan aumaǵynda mekendegen saq taıpalaryna tán. Tabylǵan qazbalar shamamen b.z.d. IV-III ǵasyrlarǵa jatady.
"Toǵyzbūlaq-1 jáne Toǵyzbūlaq-2 qorymdarynan tabylǵan zattar erte temír dáuírímen merzímdeledí jáne qazírgí Ūıǵyr audanynyń aumaǵy saq mádenıetí ortalyqtarynyń bírí bolǵanyn dáleldeıdí", delíngen unıversıtet habarlamasynda.