Travel XP halyqaralyq telearnasy Instagram jelísínde Qazaqstanǵa arnalǵan jańa shyǵarylymnyń tızerín jarıyalady, – dep habarlaıdy aqshamnews.kz tílshísí.
Baǵdarlamada Almaty sayahattyń basty baǵyty retínde tańdalǵan. Jańa shyǵarylym 2026 jyldyń mausym aıynyń sońynda álemníń 110-nan astam elínde kórsetíledí.
Túsírílím jūmystary barysynda Travel XP shyǵarmashylyq toby Almatyǵa arnaıy kelíp, megapolıstíń eń tanymal turıstík oryndaryn taspaǵa túsírdí. Baǵdarlamada Kóktóbe, Kók bazar, Arbat, 28 gvardıyashy-panfılovshylar sayabaǵy, Respublıka saraıy jáne shahardyń ózge de kóríktí nysandary qamtylǵan. Túsírílímdí ūıymdastyruǵa Almaty Tourism Bureau qoldau kórsettí.
Aldaǵy shyǵarylym halyqaralyq audıtorıyany Qazaqstannyń eń írí qalasynyń tabıǵatymen, baı mádenıetímen, gastronomıyalyq erekshelíkterímen jáne zamanauı tynys-tírshílígímen tanystyrady.
Álemdegí jetekshí turıstík telearnalardyń bírínde Almaty turaly baǵdarlamanyń kórsetíluí qalanyń turıstík áleuetín ílgeríletudíń tıímdí tetígíne aınalmaq. Būl joba mıllıondaǵan kórermenge Almatynyń kórkem tau tabıǵaty, qarqyndy qala mádenıetín jáne san aluan demalys múmkíndíkterí turaly keńínen maǵlūmat beredí.