Venesýela Joǵarǵy soty eldiń burynǵy atqarýshy vıse-prezıdenti Delsı Rodrıgesti ýaqytsha memleket basshysy etip taǵaıyndady, - dep habarlaıdy aqshamnews.kz tilshisi DW agenttigine silteme jasap habarlady.
Joǵarǵy sottyń sheshimi nege baılanysty qabyldandy?
Sot sýdıasy Taná D’Amelıonyń aıtýynsha, sheshim 3 qańtarda bolǵan oqıǵalarǵa baılanysty qabyldanǵan. Venesýela bıligi bul jaǵdaıdy syrtqy áskerı agresıa jáne eldiń qazirgi prezıdenti Nıkolas Madýrony urlaý áreketi retinde baǵalaǵan.
Joǵarǵy sot bul qadamnyń ýaqytsha sıpatta ekenin atap ótti. Negizgi maqsat – memlekettik ınstıtýttardyń úzdiksiz jumysyn, ulttyq qaýipsizdik pen qorǵanysty qamtamasyz etý.
Nıkolas Madýro qyzmetinen alyndy ma?
AFP agenttiginiń málimetinshe, Nıkolas Madýro resmı túrde prezıdenttik qyzmetinen shettetilgen joq. Bul – mańyzdy jaıt. Sebebi, memleket basshysy qyzmetinen alynǵan dep tanylsa, Venesýela konstıtýsıasy boıynsha 30 kún ishinde jańa prezıdent saılaýy ótýge tıis bolar edi.
Delsı Rodrıges ne deıdi?
DPA agenttiginiń habarlaýynsha, Delsı Rodrıges ýaqytsha prezıdent mindetin atqarýǵa daıyn ekenin málimdegen. Sonymen birge ol kópshilik aldynda Nıkolas Madýroǵa adaldyǵyn jasyrǵan joq.
«Bul elde bir ǵana prezıdent bar. Onyń aty – Nıkolas Madýro Moros», – dedi Delsı Rodrıges Ulttyq qorǵanys keńesiniń otyrysynda.
AQSH málimdemeleri jaǵdaıdy ýshyqtyrdy
Buǵan deıin AQSH prezıdenti Donald Tramp amerıkalyq áskerılerdiń Karakastaǵy túngi operasıa kezinde Nıkolas Madýro men onyń jubaıyn ustap, elden alyp shyqqanyn málimdegen edi. Aqparat kózderi áskerı jáne strategıalyq nysandarǵa, sonyń ishinde parlament ǵımaratyna soqqylar jasalǵanyn habarlady.