Saılau kúní qor atynan Qazaqstannyń 20 qalasynda 582 ókíl jūmys ístep, 457 saılau uchaskesí tūraqty baıqaumen qamtylǵan, dep habarlaıdy aqshamnews.kz tílshísí.
«El Dauysy» qoǵamdyq qory 2026 jylǵy 23 tamyzda ótken Qūryltaı deputattaryn saılaudaǵy dauys beru barysyna júrgízílgen qoǵamdyq baıqaudyń qorytyndysyn shyǵardy.
Saılau kúní qor atynan Qazaqstannyń 20 qalasynda 582 ókíl jūmys ístep, 457 saılau uchaskesí tūraqty baıqaumen qamtylǵan. Qordyń qalǵan ókílderí mobıldí úılestírushíler retínde jergílíktí jerlerdegí baıqaushylardyń qyzmetín úılestírdí, al qajet bolǵan jaǵdaıda jedel túrde uchaskelerge baryp, aqparattyń respublıkalyq shtabqa jetkízíluín qamtamasyz ettí.
Kúní boıy qor baıqaushylary dauys beru barysyn, belgílengen rásímderdíń saqtaluyn, baıqaushylardyń jūmys ísteuíne jasalǵan jaǵdaılardy baqylap otyrdy. Al saılau uchaskelerí jabylǵannan keıín dauystardy sanau protsesí men qorytyndy hattamalardyń rásímdeluín qadaǵalady.
Qordyń respublıkalyq shtabyna yqtımal kemshílíkter men dauly jaǵdaılar turaly 11-ge juyq habarlama kelíp túsken. Aldyn ala tekseruden keıín bastapqy qorytyndy jasalǵan sátte olardyń tek úsheuí rastalǵan.
Onyń ekeuí dauys beru kabınalary ornalasqan aumaqta beınebaqylau kameralarynyń boluyna qatysty bolǵan. Alaıda baıqaushylardyń būǵan nazar audarǵanynyń arqasynda aumaqtyq saılau komıssıyasynyń ókílderí eskertudí der kezínde joıyp, kameralardy sol jerde jauyp tastady.
Taǵy bír jaǵdaı Aqtóbedegí №25 saılau uchaskesínde tírkelgen. Ol múgedektígí bar, arbamen qozǵalatyn azamat úshín saılau uchaskesíníń qoljetímdílígíne qatysty boldy.
Aldyn ala qorytyndy jasalǵan sátte baıqaumen qamtylǵan ózge saılau uchaskelerínde dauys beru barysyna qatysty auqymdy tūjyrym jasauǵa negíz bolatyn rastalǵan faktíler qor tarapynan tírkelgen joq.
«El Dauysy» baıqaushylary anyqtalǵan kemshílíkterdíń eleusíz sıpatta bolǵanyn atap óttí. Al olardyń dauys beru barysy men onyń nátıjesíne aıtarlyqtaı áser etuí múmkín zań būzushylyqtar tírkelmegenín aıtty.
Ūsynylǵan derekter osy uaqytqa deıín óńdelíp, rastalǵan aqparatty qamtıdy. Dauys beru bír kún būryn ayaqtalǵanymen, 23 tamyz kúní 20 qaladan 20-dan astam jūmys jáne úılestíru chatyna úzdíksíz aqparat kelíp túsken. Būl – saılau uchaskelerínen joldanǵan habarlamalar, esepter, foto jáne beınematerıaldar men qūjattardan tūratyn auqymdy aqparat massıví.
Alynǵan jáne óńdelgen derekter negízínde qor dauys berudíń ashyq árí Qazaqstan Respublıkasynyń zańnamasyna sáıkes ótkenín atap óttí.
«Bíz úshín baıqaushylarymyz jūmys ístegen uchaskelerdegí jaǵdaıdyń obektıvtí kórínísín aluy mańyzdy boldy. Aldymyzda tek zań būzushylyqtardy anyqtaımyz degen míndet bolǵan joq jáne olardyń sanyn baıqau sapasynyń kórsetkíshí dep eseptemeımíz. Kúní boıy shtabqa 20 qaladan auqymdy aqparat kelíp tústí. Búgín bíz tek tekserílíp, rastalǵan derekterdí ǵana jarıyalap otyrmyz. Qalǵan materıaldardy óńdeu jūmysy jalǵasuda. Degenmen qazírdíń ózínde saılaushylardyń belsendí bolǵanyn, dauys berudíń ashyq árí Qazaqstan Respublıkasynyń zańnamasyna sáıkes ótkenín aıtuǵa bolady. Bízdíń ūstanymymyz ózgermeıdí: aldymen faktí jáne ony tekseru, sodan keıín ǵana qorytyndy», – dedí «El Dauysy» QQ jetekshísí Aıda Djeksenova.
«El Dauysy» qoǵamdyq qory 2020 jyldan berí elektoraldyq protsesterge qoǵamdyq baıqau júrgízíp keledí. Bıylǵy saılau nauqany qor úshín altynshy baıqau nauqany boldy.