Deputattardyń óńírge jūmys sapary oblys aktıvímen kezdesuden bastaldy, dep habarlaıdy aqshamnews.kz tílshísí.
Qaraǵandy oblysynda Memleket basshysynyń «Jańa tarıhı kezeńdegí Qazaqstannyń ózektí míndetterí» atty Joldauyn júzege asyruǵa baǵyttalǵan naqty sharalar aıqyndalady. Qūjattyń negízgí basymdyqtaryn túsíndíríp, ony íske asyru joldaryn talqylau úshín óńírge Qūryltaı deputattary Ashat Aımaǵambetov, Vadım Basın, Únzıla Shapaq, Aleksandr Danılov jáne Aısūlu Súleımenova keldí. Olar oblys tūrǵyndarymen, sonyń íshínde óndírís jūmysshylarymen jáne jastarmen kezdesíp jatyr.
Deputattardyń óńírge jūmys sapary oblys aktıvímen kezdesuden bastaldy. Jıynǵa Qazaqstan Halyq Keńesíníń múshelerí men ortalyq memlekettík organdardyń ókílderí de qatysty. Kezdesude Memleket basshysynyń tapsyrmalaryn oryndau máselelerí talqylanyp, Qaraǵandy ındustrıyalyq óńíríníń damuyna tíkeleı qatysty basym baǵyttarǵa aıryqsha nazar audaryldy. Atap aıtqanda, ónerkásíptí jańǵyrtu, energetıka men ınfraqūrylymdy damytu, ınvestıtsıya tartu, tsıfrlyq tehnologıyalardy engízu jáne tūrǵyndardyń ómír súru sapasyn jaqsartu máselelerí qaraldy.
Qūryltaıdyń Áleumettík-mádenı damu komıtetíníń tóraǵasy Ashat Aımaǵambetov áleumettík sayasatty jańartu jáne kómekke mūqtaj azamattardy atauly qoldau máseleleríne toqtaldy.
– Būl – jańa Konstıtutsıya qabyldanǵannan keıíngí Memleket basshysynyń alǵashqy Joldauy. Qūjattyń basty erekshelígí – ár adam ózíne tíkeleı qatysty mańyzdy máselelerdíń jauabyn taba alady. Máselen, mūǵalím úshín óz qūqyǵynyń qorǵaluy, pedagogterge túsetín artyq júktemeníń azaıtyluy mańyzdy bolsa, dárígerler eńbekaqynyń ósuí men medıtsına salasynyń damuyna nazar audarady. Al kásípkerler úshín jańa múmkíndíkter, memlekettík basqaru men salyq júıesíndegí ózgeríster mańyzdy. Qūryltaı Prezıdent Joldauyn júzege asyruǵa baǵyttalǵan bírneshe zań jobasyn ázírlep qoıdy, – dedí deputat.
Jıynda «Halyqtyq qūrylys» bastamasy da jeke talqylandy. Ony júzege asyru úshín 2029 jyldyń sońyna deıín shamamen 6,5 trln teńge baǵyttau josparlanyp otyr. Būl jergílíktí kásíporyndardyń áleuetín arttyryp, óńírde jańa jūmys oryndaryn ashuǵa múmkíndík beredí.
Aısūlu Súleımenovanyń aıtuynsha, deputattar tūrǵyndarmen kezdesude jastarǵa da erekshe nazar audarmaq. Olarǵa belsendílík tanytyp, aldyna naqty maqsat qoya bílu, sapaly bílím alu qajettígín jetkízudí kózdeıdí. Óıtkení eldíń órkendeuíne ár azamattyń qosqan úlesí mańyzdy.
Kezdesude aıtylǵan ūsynystar Joldaudy júzege asyru jóníndegí oblystyq bíryńǵaı josparǵa engízíledí. Oblys ákímí Ermaǵanbet Bólekpaev ár míndettíń oryndalu merzímí men nátıjesíne jauapty tūlǵalar naqty kórsetílgen jospar ázírleudí tapsyrdy.
Basym míndetterdíń qatarynda jańa óndírís oryndaryn íske qosu, ınvestıtsıya tartu, ekonomıka men auyl sharuashylyǵyn tsıfrlandyru, jasandy ıntellekt tehnologıyalaryn engízu jáne eldí mekenderdí abattandyru bar. Sonymen qatar Qaraǵandy, Temírtau jáne Balqash qalalarynyń tsıfrlyq egízderín jasap, árqaısysyn damytudyń naqty josparlaryn ázírleu míndetí qoıyldy.
– Jūmysymyzdyń basty ólshemí ótkízílgen jıyndar men ázírlengen qūjattardyń sany emes, el ómíríndegí naqty ózgeríster boluy kerek. Būl – tūraqty jūmys ísteıtín kásíporyndar, senímdí ınfraqūrylym, sapaly jūmys oryndary jáne halyqqa qoljetímdí qyzmetter, – dep atap óttí óńír basshysy.
Búgín Qūryltaı deputattary Qaraǵandydaǵy kásíporyndar men joǵary oqu oryndaryn aralap, Temírtau jáne Saran qalalaryna da barady.
