Almatyda Mehanık-ǵalymdar men ınjenerlerdíń dúnıejúzílík kongresí WCMSE-2026 ashyluy óttí, – dep habarlaıdy aqshamnews.kz tílshísí.
Mehanık-ǵalymdar men ınjenerlerdíń dúnıejúzílík kongresín WCMSE-2026 ótkízu Qazaqstan Respublıkasynyń Prezıdentí Qasym-Jomart Toqaevtyń 2026 jylǵy 28 qazandaǵy «Jańa tarıhı kezeńdegí Qazaqstannyń ózektí míndetterí» atty Qazaqstan halqyna Joldauynda belgílengen basymdyqtardy íske asyru jolyndaǵy naqty qadamdardyń bírí boldy. Kongress baǵdarlamasy ónerkásíptí tehnologıyalyq jańǵyrtu, jasandy ıntellektíní engízu jáne ǵylymnyń ekonomıkanyń naqty sektorymen baılanysyn nyǵaıtu míndetterín sheshuge baǵyttalǵan.
2026 jylǵy 3 qarashada Almatydaǵy «Ǵylym ordasynyń» Úlken zalynda Kongrestíń saltanatty ashyluy óttí. 3–5 qarasha aralyǵynda ótetín Kongress álemníń 18 elínen 500-den astam ǵalymdy, ınjenerdí jáne ónerkásíp ókílín bíríktírdí. Ashylu saltanatyna Qazaqstan Respublıkasy Ǵylym jáne joǵary bílím vıtse-mınıstrí qatysty.
Kongress Qazaqstan Respublıkasy Ūlttyq ǵylym akademıyasynyń 80 jyldyǵyna, Qazaqstan Respublıkasy Ūlttyq ınjenerlík akademıyasynyń 35 jyldyǵyna jáne mashınalar men mehanızmder mehanıkasy ǵylymı mektebí men Qazaqstan Respublıkasynyń Ūlttyq ınjenerlík akademıyasynyń negízín qalaushy, akademık Ómírbek Joldasbekovtíń tuǵanyna 95 jyl toluyna arnalǵan.
Ūıymdastyrushylar qatarynda QR Ǵylym jáne joǵary bílím mınıstrlígí, QR Prezıdentí janyndaǵy Qazaqstan Respublıkasynyń Ūlttyq ǵylym akademıyasy, Qazaqstan Respublıkasynyń Ūlttyq ınjenerlík akademıyasy, Ǵylym komıtetíníń Ó.A. Joldasbekov atyndaǵy Mehanıka jáne mashınatanu ınstıtuty, ál-Farabı atyndaǵy Qazaq ūlttyq unıversıtetí, Q.I. Sátbaev atyndaǵy Qazaq ūlttyq tehnıkalyq zertteu unıversıtetí, Abaı atyndaǵy Qazaq ūlttyq pedagogıkalyq unıversıtetí jáne Halyqaralyq ınjenerlík-tehnologıyalyq unıversıtet bar.
Plenarlyq otyrysta írgelí jáne qoldanbaly mehanıkany, robototehnıka men jasandy ıntellektíní damytu, modeldeu jáne mashınalyq oqytu ádísterín qoldanu, ınjenerlík kadrlar dayarlau jáne ǵylymı ázírlemelerdí óndíríske engízu máselelerí qaraldy. Sondaı-aq ǵylymı-zertteu jáne tájírıbelík-konstruktorlyq jūmystardyń nátıjelerí negízínde daıyndalǵan «Ǵylymı mūra» serıyasynyń tórt monografıyasy tanystyryldy.
Kongrestíń alǵashqy kúnínde 100-den astam eksponatty qamtyǵan Ǵylym, tehnıka jáne tehnologıya jetístíkteríníń kórmesí jáne «Ǵylym jáne ındustrıya: Qazaqstan kásíporyndaryna arnalǵan mehanıka, robototehnıka jáne tehnologıyalyq sheshímder» atty halyqaralyq dóńgelek ústel óttí. Qazaqstandyq jáne qytaılyq seríktesterdíń ónerkásíptík óndíríske arnalǵan bírlesken ázírlemelerí ūsynyldy.
Mańyzdy oqıǵalardyń bírí «Damu» ındustrıyalyq aımaǵynda Ó.A. Joldasbekov atyndaǵy Mehanıka jáne mashınatanu ınstıtuty janyndaǵy Mashınalardy, robottardy jáne avtomattandyru qūraldaryn prototıpteu jóníndegí Qazaqstan–Qytaı ortalyǵynyń ashyluy boldy. Ortalyqtyń qūryluy joǵary tehnologıyaly óndírísterdí damytuǵa jáne halyqaralyq ǵylymı-tehnologıyalyq yntymaqtastyqty keńeıtuge baǵyttalǵan memlekettík sayasatqa saı keledí. Onyń qyzmetí otandyq ınjenerlík qūzyretterdí nyǵaıtuǵa jáne ǵylymı ázírlemelerdí ónerkásípte qoldanuǵa daıyndauǵa baǵyttalǵan.
4 qarashada «Ǵylym ordasy» men Almaty qalasynyń joǵary oqu oryndarynda alty halyqaralyq ǵylymı konferentsıya ótedí. Olardyń taqyryptary geomehanıka men geotehnıkany, sūıyqtyqtar men gazdar mehanıkasyn, mashınalar men mehanızmder mehanıkasyn, robototehnıka men mehatronıkany, kerí esepter men matematıkalyq modeldeudí, ǵaryshtyq tehnologıyalar men ınjenerlík bílím berudí qamtıdy.