2026 jylǵy 3 qarasha Almatydaǵy «Damu» ındustrıyalyq aımaǵynda Mashınalardy, robottardy jáne avtomattandyru qūraldaryn prototıpteu jóníndegí Qazaqstan–Qytaı ortalyǵy ashyldy, – dep habarlaıdy aqshamnews.kz tílshísí.
Ortalyq Qazaqstan Respublıkasy Ǵylym jáne joǵary bílím mınıstrlígí Ǵylym komıtetíníń Ó.A.Joldasbekov atyndaǵy Mehanıka jáne mashınatanu ınstıtuty janynan qūryldy.
Ortalyqtyń ashyluy Qazaqstan Respublıkasynyń Prezıdentí Qasym-Jomart Toqaevtyń 2026 jylǵy 28 qazandaǵy Qazaqstan halqyna Joldauynda belgílengen basymdyqtardy íske asyruǵa qosylǵan naqty úles boldy. Onyń qūryluy Memleket basshysynyń eldíń ındustrıyalyq-tehnologıyalyq damuyn jedeldetu, ozyq tehnologıyalardy engízu jáne otandyq ǵylymı jáne ınjenerlík áleuettí nyǵaıtu jóníndegí baǵytyna saı keledí.
Ashylu saltanaty Mehanık-ǵalymdar men ınjenerlerdíń dúnıejúzílík kongresí WCMSE-2026 ayasynda óttí. Qonaqtarǵa Ortalyqtyń qyzmet baǵyttary, ınfraqūrylymy jáne qazaqstandyq árí qytaılyq ǵalymdar men ınjenerlerdíń bírlesken jobalary tanystyryldy.
Ortalyqtyń qyzmetí mashınalardy, robottardy jáne avtomattandyru qūraldaryn prototıpteuge, bírlesken tehnologıyalyq jobalardy damytuǵa jáne ǵylymı ázírlemelerdí Qazaqstan kásíporyndaryna engízuge daıyndauǵa baǵyttalǵan. Onyń jūmysy Ó.A. Joldasbekov atyndaǵy Mehanıka jáne mashınatanu ınstıtuty, Shenyan avtomattandyru ınstıtuty jáne SIASUN kompanıyasynyń yntymaqtastyǵymen baılanysty.
Bírlesken jobalarda qazaqstandyq ınstıtut robototehnıkalyq keshenderdí ázírleushí retínde qatysady, al qytaılyq seríktester olardy daıyndauǵa jáne ónerkásíptík synaqtan ótkízuge qatysady. Ónerkásíptík seríktester men tapsyrys berushíler qatarynda Allur tobynyń «SaryarqaAvtoProm» kásíporny, «Qazatomónerkásíp» ŪAK-nyń «Semízbaı-U» JShS-í jáne KARLSKRONA sorǵy óndíru zauyty bar. Kongrestíń ashylu saltanaty ayasynda bírlesken ǵylymı-tehnologıyalyq jobalardy damytuǵa jáne ınjenerlík ázírlemelerdí Qazaqstan kásíporyndaryna engízuge baǵyttalǵan yntymaqtastyq turaly negízdemelík kelísímge qol qoıyldy.
Osylaısha, Ortalyqtyń jūmysy ǵylymı zertteulerdí naqty óndírístík míndettermen baılanystyrady. Robototehnıkalyq keshenderdí ónerkásíptík seríktestermen bírlesíp ázírleu jáne synaqtan ótkízu otandyq ınjenerlík sheshímderdí engízuge jáne kásíporyndardy tehnologıyalyq jańǵyrtuǵa jaǵdaı jasaıdy.
Ortalyqtyń ashyluyna deıín Kongress ayasynda ǵylym men óndírístíń ózara ís-qımylyna arnalǵan ǵylymı ázírlemeler kórmesí jáne «Ǵylym jáne ındustrıya: Qazaqstan kásíporyndaryna arnalǵan mehanıka, robototehnıka jáne tehnologıyalyq sheshímder» atty halyqaralyq dóńgelek ústel óttí. Baǵdarlamada robototehnıka jáne ónerkásíptík óndírístí avtomattandyru salalaryndaǵy bírlesken jūmystar ūsynyldy.
WCMSE-2026 Almatyda 3–5 qarasha aralyǵynda ótíp, álemníń 18 elínen 500-den astam ǵalymdy, ınjenerdí jáne ónerkásíp ókílín bíríktíredí. Kongress Qazaqstan Respublıkasy Ūlttyq ǵylym akademıyasynyń 80 jyldyǵyna, Qazaqstan Respublıkasy Ūlttyq ınjenerlík akademıyasynyń 35 jyldyǵyna jáne akademık Ómírbek Joldasbekovtíń tuǵanyna 95 jyl toluyna arnalǵan.