Kıno túsíru ónerí jańa tehnologıyalarmen bírge ózgeríp keledí. Būryn fılm jasau úshín kásíbı túsírílím toby, arnaıy tehnıka, qomaqty qarjy men úlken daıyndyq qajet bolsa, búgínde jasandy ıntellekt shyǵarmashylyqqa jol ashyp, kıno óndírísíníń múmkíndíkterín keńeıte tústí. Endí tyń ıdeyasy bar jasóspírím men jas avtor óz tarıhyn ekranǵa shyǵaruǵa būrynǵydan áldeqaıda qoljetímdí qūraldar arqyly múmkíndík alady.
Osy baǵytta Almatyda jastarǵa arnalǵan SI Film Lab | Freedom 250 bílím beru baǵdarlamasy íske qosylady. Joba qatysushylary jasandy ıntellekt qūraldaryn paıdalana otyryp, ózderíníń qysqametrajdy fılmderín jasap, kıno óndírísíníń negízgí kezeńderímen tájírıbe júzínde tanysady.
Kıno jasaudyń tolyq tsıklí
SI Film Lab | Freedom 250 baǵdarlamasyna Qazaqstannyń 8 meıkerspeıs ortalyǵynan aldyn ala íríkteuden ótken 100-den astam jas avtor qatysady dep josparlanǵan. Qatysushylardyń jasy – 16 men 25 jas aralyǵy.
Baǵdarlamanyń basty erekshelígí – jastarǵa jasandy ıntellektíní tek daıyn kontent aludyń qūraly retínde emes, shyǵarmashylyq oıdy júzege asyruǵa kómektesetín tehnologıya retínde meńgertu.
Osy maqsatta meıkerspeıs ortalyqtary shaǵyn kınostudıya formatynda jūmys ísteıdí. Qatysushylar jeke nemese shaǵyn toptarǵa bírígíp, óz fılmderíníń tūjyrymdamasyn ázírleıdí. Olar ǵylymı fantastıka, komedıya, roud-muvı, drama sekíldí janrlardyń bírín tańdap, shyǵarmashylyq jūmysqa kírísedí.
Fılm jasau úderísí bírneshe kezeńnen tūrady. Aldymen avtorlar oqıǵanyń jelísín oılastyryp, stsenarıı jazady. Odan keıín stsenarıı negízínde kadrlardyń retín kórsetetín raskadrovka ázírleıdí. Jasandy ıntellekt kómegímen statıkalyq beınelerdí qozǵalysqa keltíríp, beıneúzíndíler jasaıdy. Sondaı-aq fılmge dybystau, muzyka qosyp, montaj jūmystaryn júrgízedí.
Osylaısha qatysushylar bír ǵana ıdeyanyń tolyqqandy ekrandyq tuyndyǵa aınalu jolyn óz qoldarymen ótkeredí.
Jańa tehnologıya jáne shyǵarmashylyq ízdenís
Baǵdarlama ayasynda segíz praktıkalyq sabaq ótkízu kózdelgen. Olardyń barysynda jastar kıno tílíníń erekshelíkterín, oqıǵa qūrastyrudyń tásílderín, stsenarıı jazu men kórkemdík sheshím qabyldaudyń negízderín úırenedí.
Sonymen qatar jasandy ıntellektke dūrys tapsyrma beru (promptıng), suret generatsıyalau, beıne jasau, dybyspen jūmys ísteu jáne montajdau daǵdylaryn meńgeredí.
Mūndaǵy mańyzdy máseleníń bírí – jasandy ıntellektíní jauapkershílíkpen árí etıkalyq talaptarǵa saı paıdalanu. Qatysushylar óz tuyndylarynda neırojelílerdíń kómegí qoldanylǵan tūstardy míndettí túrde kórsetuí kerek.
Būl talap qazírgí tsıfrlyq ortadaǵy avtorlyq jauapkershílík, aqparattyń ashyqtyǵy men tehnologıyany sanaly qoldanu mádenıetín qalyptastyruǵa baǵyttalǵan.
Baǵdarlama sońynda árbír qatysushy ózíníń portfolıosyna engíze alatyn qysqametrajdy fılm daıyndaıdy. Yaǵnı jastar tek teorıyalyq bílím alyp qana qoımaı, naqty shyǵarmashylyq óním jasap shyǵady.
Jas avtorlardyń alǵashqy premerasy
Jobanyń qorytyndy kezeńí de erekshe formatta ūıymdastyrylady. Meıkerspeıs keńístígí uaqytsha kınoteatrǵa aınalyp, qatysushylar óz fılmderín úlken ekranda kópshílíkke ūsynady.
Premeraǵa avtorlardyń qūrdastary, oqytushylary men shaqyrylǵan qonaqtar qatysady. Jas rejısserler óz tuyndylaryn kórermenge tanystyryp, shyǵarmashylyq eńbegíníń alǵashqy nátıjesín kópshílíkpen bólísuge múmkíndík alady.
Būl – jas avtorlar úshín tek daıyn jūmysty kórsetu emes, ózíne senímdílíktí arttyruǵa, kórermenmen baılanys ornatuǵa jáne bolashaq kásíbı baǵytyn aıqyndauǵa jasalǵan mańyzdy qadam.
«Būryn fılm túsíru úshín túsírílím toby, kamera jáne byudjet qajet bolatyn. Búgínde jasóspírímge ıdeya men noutbuk jetkílíktí. Bíz jastarǵa kásíbı kınostudıyalar paıdalanatyn qūraldardy ūsynyp, eń bastysy – óz tarıhyn bayandaudy úıretemíz. Amerıkalyq kınonyń 250 jyldyq tarıhy jaqsy oqıǵanyń kez kelgen arnaıy effektíden mańyzdy ekenín dáleldedí», – deıdí «Meıkerspeıs keńeıíp keledí!» jelísíníń baǵdarlamalyq menedjerí Ádílet Bolathan.
Jastardyń tsıfrlyq áleuetín damytuǵa baǵyttalǵan bastama
SI Film Lab | Freedom 250 jobasy – «Meıkerspeıs keńeıíp keledí!» jelísíníń bílím beru bastamalarynyń bírí. Būl jelí Qazaqstan jastarynyń ınjenerlík oılau qabíletín, tsıfrlyq daǵdylaryn jáne tehnologıyaǵa degen qyzyǵushylyǵyn damytuǵa baǵyttalǵan shyǵarmashylyq zerthanalar jūmysyn bíríktíredí.
Joba AQSh-tyń Qazaqstandaǵy Dıplomatıyalyq mıssıyasy men «Shevron» kompanıyasynyń seríktestígímen júzege asyrylady. Baǵdarlama America250 bastamasymen sabaqtastyrylǵan.
Jobanyń mání tek jasandy ıntellekt arqyly fılm túsírudí úıretumen shektelmeıdí. Ol jastardyń tehnologıyany tūtynushy retínde ǵana emes, ony óz ıdeyalaryn júzege asyruǵa paıdalanatyn shyǵarmashyl tūlǵa retínde qalyptasuyna múmkíndík beredí.
Búgínde jasandy ıntellekt kınoındustrıyada da, anımatsıyada da, jarnama men tsıfrlyq medıada da keńínen qoldanylyp keledí. Mūndaı jaǵdaıda jańa tehnologıyany erte meńgeru jastarǵa bolashaq mamandyǵyn tańdauda, shyǵarmashylyq jobalaryn damytuda jáne eńbek naryǵyndaǵy básekege qabílettílígín arttyruda qosymsha artyqshylyq beredí.
Kıno – adam oıyn, sezímín, kózqarasyn kórermenge jetkízudíń erekshe ónerí. Al jasandy ıntellekt osy ónerdí júzege asyrudyń jańa múmkíndíkterín ūsynyp otyr. Degenmen tehnologıya qanshalyqty damysa da, tuyndynyń ózegínde adam ıdeyasy, qıyaly men shyǵarmashylyq ūstanymy qalatyny anyq.
SI Film Lab | Freedom 250 jobasynyń qūndylyǵy da osynda: ol jastarǵa daıyn óním ūsynbaıdy, kerísínshe, óz oqıǵasyn oılap tabuǵa, ony ekran tílímen jetkízuge jáne jańa tehnologıyany ıgeruge jol ashady.
Bálkím, búgín osy baǵdarlama ayasynda alǵashqy qysqametrajdy fılmín túsírgen jas avtorlardyń arasynan erteń Qazaqstan kınosynyń jańa buyn rejısserlerí, stsenarısterí men tsıfrlyq prodyuserlerí shyǵar. Eń bastysy – olardyń shyǵarmashylyq bastamasyna múmkíndík berílíp, alǵashqy qadamyn jasauyna qolaıly orta qalyptasuy.
Roza RAQYMQYZY