Jelíde "Altyn-Emel" ūlttyq parkí aumaǵynda túsírílgen qar barysynyń vıdeosy tarady, – dep habarlaıdy aqshamnews.kz tílshísí.
Vıdeo Instagram-paraqshada jarıyalandy.
Park qyzmetkerí, memlekettík ınspektor Erlan Moldahmetov aumaqty josparly aralau kezínde qar barysyn vıdeoǵa túsíríp alǵan.
"Būl – sırek árí asa qūndy kadrlardyń bírí. Qar barysy Qazaqstannyń Qyzyl kítabyna engen, onyń tabıǵı ortada erkín mekendeuí ekojúıeníń tūraqtylyǵy men saqtaluynyń mańyzdy kórsetkíshí sanalady", - delíngen jarıyalanymda.
Altyn-Emel - būl Jetísu oblysyndaǵy írí memlekettík ūlttyq tabıǵı park, elímízdegí eń tanymal turıstík nysandardyń bírí. Onyń negízí 1996 jyly qalanǵan jáne landshafty ártúrlí - shóldí aımaqtar, tau sílemderí, kanondar men dalaly alqaptardan tūratyn ūlan-ǵaıyr aumaqty alyp jatyr.
Park ózíníń bíregeı tabıǵatymen jáne Qyzyl kítapqa engen qūlandar, qaraqūıryqtar men basqa da sırek kezdesetín januarlarymen tanymal.