19 sáuírde Almatyda toǵyzynshy Almaty Half Marathon ótíp, oǵan álemníń 44 elínen 10 000-nan astam adam qatysty. «Bírínshí boluǵa batyldyq» korporatıvtík qory ūıymdastyrǵan jartylaı marafon dástúrlí túrde Qazaqstandaǵy írí júgíru mausymynyń bastauyn bíldíredí. Bıyl Almatyǵa 44 elden 900-ge juyq jelayaq kelíp, toǵyz jyl íshíndegí sheteldík qatysushylar sany boıynsha rekord ornady, – dep habarlaıdy aqshamnews.kz tílshísí.
2026 jyly 19 sáuírde ótken Almaty Half Marathon-ǵa 44 elden 10 000-nan astam adam jınaldy. Jarys toǵyzynshy ret ūıymdastyrylyp otyr. Qatysushylardyń dení qazaqstandyq bolǵanymen, jyl saıyn qatysushylar geografıyasy keńeıíp keledí. Bıyl jarysqa 821 sheteldík sportshy (jalpy sanynyń shamamen 8%-y) arnaıy qatysu úshín Almatyǵa keldí.
Eń kóp qatysqan elderdíń úshtígí: Reseı (346), Qyrǵyzstan (146) jáne Ózbekstan (81). Sonymen qatar Qytaı (37), AQSh (32), Ūlybrıtanıya (28), Ukraına (21) jáne Belarus (18) elderínen de qatysushylar boldy. Būl doda Azıya, Europa, Soltústík jáne Ońtústík Amerıka, Afrıka men Tayau Shyǵys elderínen kelgen jelayaqtardy bíríktíríp, Almatynyń halyqaralyq júgíru kartasyndaǵy mańyzdy ortalyq ekenín taǵy bír márte dáleldedí.
«Sporttyq turızm – qalany halyqaralyq deńgeıde tanytudyń eń tıímdí qūraldarynyń bírí. Sondaı-aq, júgírushíler kóbíne jalǵyz kelmeıdí: olarmen bírge otbasy múshelerí men dostary da keledí, būl óz kezegínde turıster sanyn arttyrady. Kóptegen sheteldík qonaq úshín būl jarys Qazaqstanmen alǵashqy tanystyqqa aınalyp, qaıta oraluǵa sebep bolady. Bízdíń zertteuímízge sáıkes, basqa qalalardan jáne shetelden kelgen qatysushylardyń 79,3%-y Almatyǵa qaıta keludí josparlap otyr. Būl jańa saparlar men qalanyń ınvestıtsıyalyq tartymdylyǵynyń artuyn bíldíredí», – dedí «Bírínshí bolu - batyldyq» korporatıvtík qory qamqorshylyq keńesíníń tóraǵasy Ǵalymjan Esenov.
Ūıymdastyrushylar ekologıyalyq talaptarǵa erekshe nazar audarady: bír rettík materıaldardy paıdalanudy azaıtyp, starttyq jıyntyqtaǵy baspa ónímderínen bas tartyp, qaldyqtardy qaıta óńdeumen aınalysatyn jergílíktí kompanıyalarmen yntymaqtasady. EcoNetwork seríktesí márede ınteraktıvtí ekologıyalyq aımaq ūıymdastyryp, jarys baǵyty boıynda plastık qaldyqtardy jınaudy qamtamasyz ettí. Jınalǵan qaldyqtardyń barlyǵy qaıta óńdeuge jíberíledí.
Sondaı-aq, sóre aldynda qatysushylar qajetsíz, bíraq jaramdy qalyń kıímderín qaldyra aldy – «Jylu» jobasynyń komandasy olardy jınap, sūryptap, mūqtaj jandarǵa jetkízdí.
Almaty Half Marathon qatysushylar úshín būrynǵydan da jaıly bola tústí: márege jetu aımaǵynda ana men bala bólmesí bar, bólek sanıtarlyq toraptar ūıymdastyrylyp, erekshe qajettílígí bar jandarǵa arnalǵan arnaıy dárethanalar ornatyldy. Būl tájírıbe Qazaqstandaǵy júgíru jarystaryn ūıymdastyrushylar arasynda alǵashqylardyń bírí bolyp engízíldí.
Aıta keteıík, 31 mamyr kúní ótetín Astana Half Marathon jarysyna tírkelu jalǵasuda. Būl ís-shara elímízdíń túkpír-túkpírínen júgíru áuesqoılaryn bíríktíredí.
Sonymen qatar 2026 jyly 27 qyrkúıekte ótetín 15-shí mereıtoılyq Almaty Marathon-ǵa da tírkelu ashyq. Būl Ortalyq Azıyadaǵy eń írí júgíru jarysy.
Almaty Half Marathon Almaty qalasy ákímdígíníń qoldauymen óttí.