Qazaqstan ınvestorlar, bıznes ókílderí jáne ózge de shetel azamattary úshín elge kíru, vıza rásímdeu jáne rūqsat qūjattaryn alu tártíbín ońtaılandyruda. Jeńíldetílgen jáne ınvestıtsıyalyq rejımder ayasynda túrlí preferentsıyalardyń keń auqymy ūsynylǵan. Būl degenímíz – ınvestorlar men kásípkerler arnaıy vızalyq rejımderdí, ótínímderdí jedel qarau rásímderín, sondaı-aq ınvestıtsıyalyq jobalardy súıemeldeu tetíkterín paıdalana alady degen sóz, – dep habarlaıdy aqshamnews.kz tílshísí.
Jeńíldetílgen sharttar sūranysqa ıe mamandyqtar boıynsha Qazaqstanda jūmys ísteu úshín keletín shetel azamattaryna, sondaı-aq memlekettík organdardyń qoldauhaty bolǵan jaǵdaıda ekonomıkalyq jáne áleumettík jobalarǵa qatysushylarǵa da qoljetímdí.
Tsıfrlyq tehnologıyalardyń qarqyndy damuy jahandyq eńbek naryǵyn túbegeılí ózgertude. Álemde jasandy ıntellektpen jūmys ísteu daǵdylary bar mamandarǵa sūranys artyp keledí. Osyǵan baılanysty sūranysqa ıe mamandyqtar tízímínde erekshe nazar ÍT salasyna audarylǵan (jasandy ıntellekt ınjenerí, aqparattyq júıeler arhıtektory, qosymsha ázírleushí, aqparattyq qauípsízdík ınjenerí jáne t.b.). Sonymen qatar densaulyq saqtau (neırohırurg, gematolog, onkolog, sáulelík dıagnostıka dárígerí jáne t.b.), kreatıvtí ındustrıya (grafıkalyq dızaıner, dybys rejısserí, grafıkalyq anımatsıya tehnıgí jáne t.b.), jaratylystanu ǵylymdary, ınjenerlík jáne óńdeu salalarynda da (farmatsevtıkalyq óndírís ınjener-tehnology, lazerlík jabdyqtar ınjenerí, bakterıolog jáne t.b.) sūranys joǵary.
Eurazıyalyq ekonomıkalyq odaqqa (Armenıya Respublıkasy, Belarus Respublıkasy, Qyrǵyzstan, Reseı Federatsıyasy) múshe memleketterdíń azamattary úshín de qolaıly jaǵdaılar jasalǵan.
EAEO ayasynda qatysushy elderdíń azamattary Qazaqstan aumaǵynda rūqsat qūjattaryn almaı-aq erkín jūmysqa ornalasu qūqyǵyna ıe. Būl jūmys kúshíníń joǵary mobıldílígín qamtamasyz etíp, ekonomıkalyq yntymaqtastyqtyń damuyna oń áserín tıgízedí. Aıta ketu kerek, dál osyndaı qaǵıdat boıynsha qazaqstandyqtar da odaqqa múshe elderde eńbek etude.
Odaqqa múshe emes elderdíń azamattary úshín eńbek naryǵynyń qajettílíkterí men kvotalau negízínde qūrylǵan jūmys kúshín tartu júıesí qoldanylady. Būl tásíl ekonomıka múddelerí men íshkí eńbek naryǵyn qorǵau arasyndaǵy tepe-teńdíktí saqtauǵa múmkíndík beredí. Osylaısha Qazaqstan ashyq árí teńgerímdí kóshí-qon sayasatyn qalyptastyryp keledí.
2026 jyldyń basynan berí sūranysqa ıe mamandyqtar boıynsha sheteldík jūmys kúshín tartuǵa 5,1 myń rūqsat beríldí, al eńbek ımmıgranttaryna shamamen 75 myń rūqsat rásímdeldí.
QR Eńbek jáne halyqty áleumettík qorǵau mınıstrlígí íshkí eńbek naryǵyn qorǵau maqsatynda jyl saıyn jūmys berushílerdíń sūranysyna sáıkes sheteldík jūmys kúshín tartu kvotasyn belgílep, bóledí.
2026 jylǵa arnalǵan sheteldík jūmys kúshín tartu kvotasy 23,6 myń adamdy qūraıdy, al eńbek ımmıgranttaryn tartu kvotasy 221,8 myń adam deńgeıínde aıqyndalǵan.
Sonymen qatar eldíń ornyqty damuyn qamtamasyz etuge jáne Qazaqstanmen óz bolashaǵyn baılanystyratyn, yaǵnı azamattyq aluǵa nıettí shetel azamattaryn qabyldau sapasyn arttyruǵa baǵyttalǵan kóshí-qon sayasaty júıelí túrde jetíldírílude.
Osyǵan baılanysty tūraqty tūruǵa rūqsat alu tetígíníń zamanauı tsıfrlyq tásílder men ashyqtyq qaǵıdattaryna negízdelgen jańartylǵan tetígí engízílude.
Jańa tártíp úmítkerlerdí kezeń-kezeńímen baǵalaudy kózdeıdí: memlekettík tíldí bazalyq deńgeıde meńgeruín tekseru, saualnamalyq derekterdí taldau, tsıfrlyq skorıng, uákílettí memlekettík organdar tarapynan tekseruler, sondaı-aq qorytyndy sūhbat.
Būl tetík Qazaqstandy ūzaq merzímge qonystanyp, qoǵam ómíríne belsendí aralasatyn el retínde tańdaıtyn azamattarǵa baǵyttalǵan.
Atalǵan tásíldí íske asyru tūraqty tūruǵa nıettí adamdardy neǵūrlym dál árí teńgerímdí qabyldaudy qamtamasyz etíp, kóshí-qon úderísteríníń tıímdílígín arttyruǵa jáne áleumettík tūraqtylyqty nyǵaıtuǵa múmkíndík beredí. Jalpy, qabyldanyp jatqan sharalar memleket, qoǵam jáne ekonomıka múddeleríne saı keletín ashyq, pragmatıkalyq árí jauapty kóshí-qon sayasatyn qalyptastyruǵa baǵyttalǵan.