Jarys jyl saıyn Reseı Federasıasynda ótkiziledi. Bıyl ol Krasnodar ólkesiniń Molkıno kentinde ótýde.
Qazaqstan Respýblıkasy Qorǵanys mınıstrligi arnaıy maqsattaǵy bólimsheleriniń áskerı qyzmetshileri arnaıy maqsattaǵy barlaý toptary arasyndaǵy «Jasyl soqpaq» dalalyq mashyqtaný konkýrsynda baǵyn synaýda, dep habarlaıdy Almaty-akshamy.kz QR Qorǵanys mınıstrliginiń baspasóz qyzmetine silteme jasap.
«Jasyl soqpaq» – eń bedeldi konkýrstyń biri. Oǵan Baltyq teńizinen Tynyq muhıtyna deıingi aralyqta ornalasqan Reseı Federasıasynyń barlyq okrýginiń arnaıy maqsattaǵy bólimsheleriniń komandalary, sondaı-aq UQSHU elderiniń arnaıy maqsattaǵy bólimsheleri qatysady.
Saıys 20-dan astam kezeńdi qamtıdy. Barlaýshylar alys qashyqtyqqa jyljý, sý kedergisinen ótý, arnaıy mindetti oryndaý, jaýyngerlik oq atý jáne barlaý tobyn qarsylas tylyna shyǵarý kezinde toptardyń áreket etýin pysyqtaýmen saıysqa túsedi. Jarystyń barlyq kezeńin oryndaýǵa 100 saǵat bólinedi. Mindet toqtaýsyz oryndalady. Beriktik pen tózimdilikti anyqtaıtyn basty synaq 10 jáne 30 kılometr qashyqtyqta júgirý bolyp tabylady.
Jarystyń sońǵy kezeńinde qatysýshylar shartty qarsylastyń dıversıalyq toptaryn torýyldap, olardyń shabýylyna toıtarys beredi.
Qorytyndylaý kezinde barlaýshylardyń áskerı topografıa salasyndaǵy bilimi, búrkemeleý, jasyryn jyljý sheberligi, lagerdi uıymdastyrýy, medısınalyq jáne ınjenerlik daıarlyq daǵdylary eskeriletin bolady.
Barlaýshylar konkýrsqa qatysa otyryp, ár túrli óńirde, tabıǵı jáne klımattyq jaǵdaılarda jaýyngerlik is-qımyldardy júrgizýde tájirıbe jınaqtaıdy.
Bıylǵy jyly 47-shi ret ótkizilip otyrǵan «Jasyl soqpaq» saıysy 2 shildede bastalǵan, 13 shildege deıin jalǵasady.