Óńírlík kommunıkatsıyalar qyzmetínde ótken brıfıngte Almaty qalasy Bílím basqarmasynyń basshysy Sáken Aralbaev osylaı dedí, – dep habarlaıdy aqshamnews.kz tílshísí.
Almaty bílím beru ınfraqūrylymyn damytyp jatyr. «Keleshek mektepterí» ūlttyq jobasy ayasynda oqu jyly íshínde 13 jańa mektep paıdalanuǵa beríldí.
Jańa bílím beru nysandarynyń ashyluy oqushy ornynyń tapshylyǵyn edáuír azaıtyp, qalanyń bílím beru salasyn keńeıtuge múmkíndík berdí.
Sonymen qatar, memlekettík-jekemenshík áríptestík tetígí arqyly jalpy syıymdylyǵy 10 500 oryndyq taǵy jetí mekteptíń qūrylysy ayaqtaldy. Qazírgí uaqytta olardy bílím beru júıesíne tabys etíp jatyr.
Sondaı-aq jergílíktí byudjet qarajaty esebínen Zerdelí shaǵyn audanynda 550 oryndyq mektep salyndy.
Osylaısha, bıylǵy 1 qyrkúıekke deıín Almatyda jalpy syıymdylyǵy 11 050 oqushy ornyna arnalǵan segíz jańa mektep ashu josparlanyp otyr.
Sonymen qatar qoldanystaǵy bílím beru nysandaryn jańǵyrtu jūmysy da qarqyn aldy. 2025–2027 jyldyń aralyǵynda 26 mektepte kúrdelí jóndeu júrgízu josparlanǵan. Bıyl qaladaǵy 227 memlekettík mekteptíń 159-y jóndeu jūmysymen qamtylady.
«Balalardyń qauípsízdígí máselesíne erekshe kóńíl bólíndí. Búgínde Almatydaǵy barlyq memlekettík mektepter 100 paıyz beınebaqylau júıesímen, dabyl túımesímen jáne polıtsıyanyń Jedel basqaru ortalyǵymen bíríktírílgen turnıkettermen qamtamasyz etílgen», – dedí spıker.
Bílím beru ūıymdarynda 17 570 beınebaqylau kamerasy, 227 dabyl túımesí jáne 1 300-den astam kírudí baqylau júıesí ornatylǵan.
Qūqyq būzushylyqtardyń aldyn alu jáne qauípsízdík deńgeıín arttyru maqsatynda pılottyq rejımde Target Eye júıesí engízíle bastady. Alatau audanyndaǵy on mektepte jasandy ıntellekt tóbeles pen yqtımal janjaldy avtomatty túrde anyqtauǵa kómektespek.
Sondaı-aq «Mektep avtobusy» jobasy ayasynda búgínde qala boıynsha 65 mektep qamtylyp, 13 539 oqushy tasymaldanady. Būl jūmysty 295 avtobusy bar avtopark moınyna alǵan.