Almatyda 2025–2026 oqu jylynyń qorytyndysy boıynsha mektep oqushylarynyń bílím sapasy 68,7%-ǵa jettí, – dep habarlaıdy aqshamnews.kz tílshísí.
Būl byltyrǵymen salystyrǵanda 2,9 paıyzdyq tarmaqqa joǵary. Óńírlík kommunıkatsıyalar qyzmetínde Bílím basqarmasynyń basshysy Sáken Aralbaev osylaı dedí.
Qalada 360 mektep jūmys ísteıdí, onda 357 225 oqushy bílím alyp jatyr. Memlekettík mektepterde 314 456 oqushy tírkelse, jekemenshík mektepterde 42 769 bala oqıdy.
Bıyl 17 187 túlek 11-synypty támamdady.
Basqarma basshysynyń aıtuynsha, Almaty elímízdíń bílím beru salasyndaǵy kóshbasshy mártebesín saqtap qaldy. Qala qūramasy 24 jyl qatarynan jaratylystanu-matematıkalyq baǵyt boıynsha Qazaqstanda bírínshí oryndy ıeleníp keledí. Sonymen qatar, almatylyq oqushylar halyqaralyq olımpıadalar men ǵylymı jobalar baıqauynda joǵary nátıje kórsettí.
Pedagogter de eleulí jetístíkterge jettí. Bıyl №95 lıtseıdíń mūǵalímí Tatyana Belousova halyqaralyq Global Teacher Prize syılyǵynyń nūsqasy boıynsha álemníń eń úzdík 50 mūǵalímíníń qataryna endí.
«Túlekterdíń Ūlttyq bíryńǵaı testíleuge qatysuy mańyzdy kórsetkísh bolyp qala beredí. 2026 jyly Almatyda 15 251 túlek ŪBT tapsyrudy josparlap otyr. Olardyń basym bólígí — 8 684 adam testíleudí qazaq tílínde tapsyrady, 6 566 túlek orys tílín tańdap otyr», — deıdí Sáken Aralbaev.
Sonymen qatar, 1 990 túlek ŪBT-ǵa qatyspaıdy. Onyń negízgí sebebí — sheteldík joǵary oqu oryndaryna túsuí. Būdan bólek, 342 oqushy sheteldík unıversıtettíń fılıalyna íshkí qabyldau emtıhanynyń nátıjesí boıynsha túsudí josparlasa, 169 túlek kolledjde bílím aludy tańdaǵan. Bıyl ŪBT-ǵa qatysu úshín erekshe bílím beru qajettílígí bar 235 oqushy tírkelgen.
Bílím beru salasyn tsıfrlyq transformatsıyalauǵa erekshe kóńíl bólíndí. Qazírgí uaqytta qaladaǵy barlyq memlekettík mektepter jyldam ınternetpen qamtamasyz etílgen. 200 myńnan astam bílím beru úderísíne qatysushy Gemini, NotebookLM jáne Canva sıyaqty zamandyq jasandy ıntellekt qūraldaryn paıdalanady.
Edata.kz platformasynda 83 myńnan astam tsıfrlyq bílím beru resursy ázírlengen. Sondaı-aq barlyq mektepter jasandy ıntellekt platformasy arqyly 6 500 elektrondy oqulyqqa tegín qol jetkízdí.