Dubaıda (BAÁ) ótíp jatqan UAE SWAT Challenge halyqaralyq turnıríníń bírínshí kúní Qazaqstan komandalary úshín sáttí óttí. 48 memlekettíń 109 arnaıy jasaq komandasy qatysqan básekede elímízdíń tórt komandasy da úzdík ondyqqa eníp, turnır kestesíníń joǵarǵy bólígínen kóríndí.
Dubaıdaǵy tartysty saıystyń alǵashqy kún qorytyndysy boıynsha Kazakhstan C komandasy jalpy esepte bírínshí orynǵa jaıǵasty. Odan keıín Kazakhstan D komandasy ekínshí orynnan kóríndí. Al Kazakhstan B komandasy tórtínshí orynǵa tūraqtasa, Kazakhstan A qūramasy onynshy orynǵa kóteríldí. Osylaısha Qazaqstannyń tórt komandasy da alǵashqy kúnnen-aq úzdíkter qatarynan tabylyp, joǵary nátıje kórsettí.
Turnırdegí erekshe nazar audartqan jaıttardyń bírí – elímízdíń Tomiris qyzdar komandasynyń kórsetkíshí. Komanda jalpy esepte 20-orynǵa ornalasyp, būl nátıje áıelder komandalary arasyndaǵy eń úzdík kórsetkísh retínde ataldy.
Qazaqstan atynan qatysyp jatqan qūramalar bír tudyń astyna QR Memlekettík kúzet qyzmetí, QR Ūlttyq qauípsízdík komıtetí jáne QR Íshkí íster mınıstrlígí arnaıy maqsattaǵy bólímsheleríníń tańdauly jauyngerlerín bíríktírgen. Būl – tájírıbe men kásíbı daıyndyq toǵysqan bíríkken kúshtíń nátıjesí.
Aıta keteıík, bes kúnge josparlanǵan halyqaralyq turnır 11 aqpanda máresíne jetedí. Alda álí bírneshe kezeń bar. Elímízdíń komandalaryna qalǵan syndardan da súrínbeı ótíp, jeńíspen oraluyn tíleımíz.
