Qazaqstanda bıyl jol qaýipsizdigi ahýaly kúrdeli bolyp otyr, - dep habarlaıdy Aqshamnews.kz.
Ortalyq komýnıkasıalar qyzmetindegi brıfıńte İİM Ákimshilik polısıa komıteti tóraǵasynyń orynbasary Ǵalym Sarǵulovtyń málimdeýinshe, 2024 jyldyń basynan beri 29 myńnan astam jol-kólik oqıǵasy oryn alyp, saldarynan 1 916 adam kóz jumǵan, 40 myńnan astamy túrli jaraqat alǵan.
Spıkerdiń aıtýynsha, apattardyń negizgi sebepteri jyldar boıy ózgermeı keledi:
– jyldamdyqty shamadan tys asyrý;
– mas kúıinde kólik júrgizý;
– jaıaý júrginshilerdiń joldy belgilenbegen jerden kesip ótýi;
– júrgizýshiler tártibiniń tómendigi.
Tek joǵary jyldamdyqtyń kesirinen 406 adamnyń ómiri qıylǵan. Qarsy jolaqqa shyǵýdan – 400, joldy ruqsat etilmegen jerden ótýden – 67 adam qaza tapqan.
Joldaǵy tártipsizdik kólemi de alańdatarlyq
Jyl basynan beri:
– 12 mln-nan astam jol erejesin buzý deregi anyqtaldy;
– 21 myń mas júrgizýshi ustaldy;
– 25 myń adam júrgizýshi kýáliginen aıyryldy;
– 21 myń azamat ákimshilik qamaýǵa alyndy;
– 401 myń jaıaý júrginshige aıyppul salyndy.
Sarǵulovtyń aıtýynsha, jol qozǵalysy qaýipsizdigin arttyrý maqsatynda sıfrlyq baqylaý kúsheıtilip jatyr. Qazir:
– 523 mobıldi baqylaý kesheni jumys isteıdi;
– «jasyryn patrúl» ádisi qoldanylady;
– drondar arqyly 4 myńnan astam quqyqbuzýshylyq tirkelgen;
– barlyq kameralar men sıfrlyq júıeler «TOR» platformasyna biriktirilgen.
Bul tehnologıalar izdeýdegi kólikterdi anyqtaýǵa, agressıvti júrgizýshilerdi baqylaýǵa, úzdiksiz uzaq jol júrgen «sharshaǵan júrgizýshilerdi» belgileýge múmkindik beredi.
Ortasha jyldamdyqty baqylaý da kúsheıtiledi.
Qazir uzyndyǵy 2 myń shaqyrym bolatyn 8 tasjolda ornatylǵan júıe aldaǵy ýaqytta taǵy 10 iri baǵytta iske qosylady. «Astana–Shýchınsk» jáne «Astana–Qaraǵandy» trassalaryna 56 LED aqparattyq belgi ornatylyp, aýa raıyna baılanysty jyldamdyq ózgertiletin rejım engizildi.
Jaıaý júrginshiler qaýipsizdigi - basym baǵyt.
Júrginshilerge jol bermeý derekterin azaıtý úshin arnaıy avtomattandyrylǵan keshender ornatylýda. Qaraǵandy oblysynda mundaı 22 keshen jumys istep, 7 myńnan astam buzýshylyqtyń jolyn kesken. Eń mańyzdysy - ornatylǵan aımaqtarda birde-bir jol apaty tirkelmegen. Bul tájirıbe taǵy bes óńirde júzege asyrylady.